Sport Club Gjilani e ka dënuar ashpër incidentin e ndodhur në kryendeshjen e javës së 27-të në Superligën e Kosovës në futboll kundër Ballkanit.

Disa tifozë e sulmuan portierin mysafir, Stivi Frashërin gjatë festës së golit të minutës së fundit të skuadrës së tyre. Si pasojë e sulmit, Frashëri u dërgua me urgjencë në spital, raporton Demokracia.com.

Gjilani në komunikatën e lëshuar ka theksuar se ka qenë reagimi i dobët i Policisë së Kosovës në momentin e hyrjes së tifozëve në fushë.

Klubi nga Anamorava gjitashtu i kanë kërkuar falje publike klubit rival, ndërsa Frashërit i kanë uruar shërim të shpejtë.

Reagimi i plotë i Gjilanit:

KOMUNIKATË ZYRTARE:

Sport Club Gjilani dënon ashpër incidentin e ndodhur në duelin e xhiros së XXVII-të në BKT Superligë ndaj skuadrës së Ballkanit.

Si klub nikoq i kësaj ndeshje kishim ndërmarrë të gjitha masat e sigurisë për të garantuar sigurinë dhe mbarëvajtjen e ndeshjes, ndër të tjerash kishim siguruar edhe qëndrimin e tifozëve mysafir.

Për planin operacional të sigurisë dhe organizimit të ndeshjes janë njoftuar para ndeshjes personat zyrtar nga Federata e Futbollit e Kosovës, si dhe vet klubi mysafir.

Për fat të keq situata u agravua në minutat shtesë të ndeshjes me rastin e golit të barazimit dhe si rrjedhojë e reagimit të dobët nga Policia e Kosovës erdhi edhe incidenti, me ç’rast u lëndua futbollisti Stivi Frashëri, të cilit i urojmë shërim të shpejtë në rend të parë dhe ndjesë për këtë ngjarje, e cila vetëm Sport Club Gjilanit nuk guxon t’i ndodh.

Gjithashtu, Klubit Futbollistik “Ballkani” i kërkojmë ndjesë publike dhe i garantojmë gjithashtu që ky akt i shëmtuar nuk do t’i dëmtojë asnjëherë raportet e klubeve mes vete.

Zyrtarët përgjegjës për siguri dhe organizimin e ndeshjes kanë evidentuar vërejtjet pas përfundimit të ndeshjes dhe po punojnë në identifikimin e personave të cilët kryen këtë akt vandal, për t’u ndaluar përjetësisht hyrjen në ndeshjet e organizuara nga Sport Club Gjilani.

Sport Club Gjilani shpreh keqardhje për gjithë atë se çfarë ka ndodhur dhe do të përkujdeset me përgjegjësinë më të lartë që ky të jetë incidenti i fundit, në ndeshjet të cilat organizohen nga klubi.

Sport Club Gjilani

03 Prill, 2022./Demokracia.com/