I dërguari special i Gjermanisë për Ballkanin Perëndimor, Manuel Sarrazin, theksoi se liderët politikë duhet të kenë guximin të bëhen bashkë për të arritur qëllimin e përbashkët shtetëror.

“Sigurisht që në Gjermani është një situatë tjetër politike. Ndonjëherë është më e lehtë në Berlini të flasësh për Maqedoninë e Veriut, por gjithashtu është më lehtë të flasësh për Berlinin nga Shkupi”, tha Sarazin në “TV21”.

Sarrazin tha se është për miratimin e ndryshimeve kushtetuese dhe shtoi se muaji i ardhshëm do të shënohet në histori si fillimi i një fytyre të re të historisë evropiane.

“Doja të vija të bisedojmë sërish këtu në Shkup. Kam qenë këtu para verës dhe jam këtu sërish për ndryshimet kushtetuese. Mendoj se muaji i ardhshëm do të hyjë në histori si fillimi i një kapitulli të ri në historinë evropiane, sepse do të fillojë një trend i ri zgjerimi. Siç e thashë edhe para verës, ndryshimet duhet të ndodhin, mos humbasim kohë më kot”, tha Sarrazin.