Berat Rukiqi nga LDK për arsyet se pse po vonohen riparimet e blloqeve ka thënë se këto arsye duhet t’i jep Qeveria, Bordi i KEK-ut dhe strukturat udhëheqëse të KEK-ut.

“Në një krizë energjetike që ka qenë në dy vitet e fundit duke ditur çmimet e paparashikuara të importit, secila Qeveria dhe secila strukturë që qeveriset nga kjo qeveri do të duhej të ishte më e përgatitur dhe t’i kryente detyrat në kohë pasi që është situatë emergjente dhe në këto situata duhet të veprohet më shpejt se sa në situata normale”, ka thënë Rukiqi.

“Ajo që neve na shqetëson që kjo mospërfundim në kohë i remontit ka shkaktu mungesë në bilancin energjetik të vendit dhe kjo mungesë është kompensu me import dhe ky import sot kushton më shumë se çdo herë tjetër në tregun energjetik”, ka thënë tutje Rukiqi në “FIVE” të RTV Dukagjini.

Rukiqi për rritjen e çmimit të energjisë elektrike ka thënë se mund të shmangej nëse do të kishte veprime në kohë, duke shtuar se kjo rritje do të vërehet më shumë në dimrin e ardhshëm.

“Çdo kosto shtesë sot për qytetarin e bën diferencën”, ka shtuar Rukiqi.

Ndërsa për uljen e deficitit buxhetor Rukiqi ka thënë se nuk duhet të kemi më shumë se 3 për qind të deficitit buxhetor në raport me JTP-në e vendit. Ai shtoi se ministrit jetike për zhvillim ekonomik nuk kanë investime kapitale.