Dhomat e Specializuara të Kosovës (DhSK) në Hagë kanë rrëzuar kërkesën e dëshmitarit Kurtesh Fondaj, që t’i caktohet një avokat mbështetës në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit. 

Fondaj në fillim të seancës kërkoi avokat, me pretendimin se është ndier i keqpërdorur.

Sipas kryetarit të trupit gjykues, Charles Smith III, nuk është ngritur asnjë pretendim se dëshmitari ka kryer ndonjë krim dhe se nuk është përgjigjur në ndonjë formë që si rrjedhojë ta ketë inkriminuar veten.

“Zotëri Fondaj, e kuptoj që keni biseduar me Zyrën Administrative dhe i keni shprehur shqetësimet tuaja. Ne i kuptojmë shqetësimet tuaja tani unë do t’i përgjigjem disi pretendimeve tuaja. Që të caktojmë një avokat ne për dëshmitarin duhet të ketë arsye të forta që dëshmitari mendon se po e inkriminon veten dhe mendon se po e akuzojnë se është kryerësi i një krimi. Ky nuk është rasti ynë. Në asnjë moment nuk është ngritur ndonjë pretendim, je një person i nderuar. Askush nuk ka pretenduar që keni kryer krim apo që jeni përgjigjur në ndonjë formë që t’iu ketë inkriminuar në ndonjë formë”, tha kryetari i trupit gjykues.

Si rrjedhojë, gjyqtari e njoftoi dëshmitarin se kërkesa e tij për një avokat është rrëzuar.

“Po ashtu, jeni shqetësuar për pyetjet e gjykatësve, sipas rregullores sonë, gjykatësit mund t’iu drejtojnë pyetje dëshmitarëve gjatë procesit gjyqësor. Ju jeni këtu thjesht për ta thënë të vërtetën, për t’iu përgjigjur pyetjeve me aq sa mundeni. Ne e kuptojmë që është stresuese kjo situatë dhe ne e vlerësojmë faktin që keni ardhur dhe që po bëni të pamundurën. Ne do të vazhdojmë. Ne të kemi edhe disa pyetje dhe shpresojmë që të mbarojmë sa më shpejtë, në mënyrë që të largoheni. Kështu që, kërkesa e juaj për një avokat në këtë moment rrëzohet”, tha Charles Smith III.

Më pas, me pyetje për dëshmitarin vazhdoi gjyqtari Guénaël Mettraux, i cili ia prezantoi dëshmitarit një dokument në të cilin sipas tij thuhej se Fatmir Limaj i kërkon një prokurori që të fillojë hetime penale.

“Kisha kërku të më kurseni nga këto çështje se së pari për mua ky dokument nuk është valid dhe nuk mban nënshkrimin e personit për të cilin po flitni, kështu që për mua është dokument i dyshimtë. Nuk po mundem të prononcohem për këtë çështje se nuk kam njohuri dhe thjesht nuk e di se cila është baza ligjore që është thirrë dhe dokumentin e tillë, respektivisht rregulloren që po flasim nuk e kam pas në dorë dhe nuk e di a është e shkrume saktë”, tha dëshmitari.

Dëshmitari Fondaj kërkon avokat: Mendoj se jam keqpërdor

Pas rikthimit të tij në sallën e gjyqit të mërkurën, për ta vazhduar dëshminë që e nisi të hënën, dëshmitari Kurtesh Fondaj deklaroi se është keqpërdorur, me ç’rast kërkoi edhe një avokat për mbështetje.

“Unë dje pasdite i kam pa në incizimet që janë prezantu nga gjykata dhe i kam përcjellë me vëmendje dhe sidomos marrja në pyetje nga gjyqtari më ka ba me mendu që me kërku një avokat, respektivisht për një mbështetje nga një avokat se po mendoj se jam keqpërdor”, tha dëshmitari.

Më pas, kryetari i trupit gjykues, Charles Smith III e pyeti dëshmitarin nëse e ka bërë një kërkesë të tillë.

“Po e kërkoj prej juve të ma ofroni ndihmën e një avokati”, u përgjigj dëshmitari Fondaj.

Më pas, seanca kaloi në pushim për pesë minuta për shkak të kërkesës së dëshmitarit.

Ndryshe, Charles Smith III njoftoi se të hënën seanca do të fillojë nga ora 10:00 dhe jo si në orarin e zakonshëm. Ndërsa, i kërkoi ZPS-së shpjegime për dëshmitarin me kodin 04444./betimi për drejtësi/