Zyra e Rregullatorit të Energjisë së Kosovës ka njoftuar se kanë mbajtur takim me disa përfaqësues për të diskutuar rritjen e çmimit të rrymës për 15%, ku në njoftim kanë thënë se përfaqësuesit e grupit “Asnjë cent më shumë”, nuk i janë përgjigjur ftesës.

Luan Hasanaj, nga ky grup ka reaguar duke thënë ZRrE nuk i ka dërguar asnjë ftesë për takim.

Madje Hasanaj në reagimin e tij ka ftuar ZRrE-në që të publikojë ftesën për të cilën thonë se kanë ftuar në takim edhe grupin “Asnjë cent më shumë”.

Postimi i plotë:

Reagim ndaj postimit të Zyrës së Rregullatorit për Energji (ZRRE) – 04.04.2025

Organizata Let’s Do It Kosova, si iniciuese e fushatës #AsnjeCentMeShume, ndjen nevojën të reagojë ndaj pjesës së postimit zyrtar të ZRRE-së ku thuhet se nuk i jemi përgjigjur ftesës për diskutim publik në kuadër të shqyrtimit tarifor 2025.

Kjo nuk është e vërtetë.

Deri në këtë moment, nuk kemi pranuar asnjë ftesë zyrtare nga ZRRE për ndonjë takim konsultativ.

Ftojmë ZRRE-në të bëjë publike dokumentin zyrtar (emailin, numrin e protokollit apo metodën e dërgimit) përmes të cilit pretendohet se jemi ftuar. Deri atëherë, konsiderojmë se ky pohim është i pavërtetë dhe tenton të dëmtojë integritetin dhe transparencën e angazhimit tonë qytetar.

Për publikun:

Grupi qytetar #AsnjeCentMeShume nga aktivistë të shoqërisë civile si një iniciativë e pavarur, jo-partiake dhe qytetare, që reflekton reagimin e drejtë dhe të domosdoshëm të qytetarëve ndaj propozimit për rritjen e tarifave të energjisë elektrike.

Gjatë periudhës së konsultimeve, kemi dorëzuar me shkrim komentet tona brenda afatit ligjor. Këto materiale janë të plota dhe ZRRE i ka në posedim. Për më tepër, ne kemi qenë aktivë publikisht dhe institucionalisht në çdo hap të këtij procesi.

Qëndrimi ynë është i qartë:

• Nuk pranojmë që pjesëmarrja në konsultim të zvogëlohet në një ftesë informale apo selektive.
• Konsultimi publik nuk bëhet me takime të mbyllura, të përziera, me axhenda të paqarta.
• Ne kërkojmë pezullimin e vendimit për rritjen e tarifave, deri në konstituimin e institucioneve të reja dhe nisjen e një debati real, të gjerë dhe transparent.

Qytetarët e këtij vendi kanë të drejtë të jenë të dëgjuar – jo të keqinformuar.