Lajme
Qeveria merr vendim për veturat me targa serbe, shkel legjislacionin në fuqi
Demokracia
17:43 | 29 Qershor 2022

Share:

Qeveria e Kosovës ka mbajtur mbledhje online, ku është diskutuar çështja e targave të automjeteve të serbëve të Kosovës, të cilët i kanë regjistruar veturat e tyre në Serbi.

Shumë vetura në Kosovë ende qarkullojnë me targat “PR”, “KM”, “PZ”, “GL”, “UR”, “PE”, “DA” apo “ĐA” edhe pas marrëveshjes së fundit që është arritur në Bruksel. Por, pas vizitës së Përfaqësuesit të Posaçëm të Bashkimit Evropian për dialogun Kosovë – Serbi dhe çështje të tjera rajonale të Ballkanit Perëndimor, Mirosllav Lajçak, Qeveria e Kosovës ka mbajtur mbledhje, raporton Demokracia.com.

Përmes një njoftimi, Zyra e Kryeministrit ka bërë të ditur se të gjitha këto vetura që janë të pajisura me targa nga autoritetet serbe, nga 10 qershori 1999 deri më 21 prill 2022, do t’u mundësohet regjistrimi i mjeteve me targa RKS. Sipas këtij vendimi, regjistrimi do të fillojë më 01.08.2022 dhe do të zgjasë deri më 31.09.2022.

Mirëpo, me këtë vendim, Qeveria ka shkelur ligjislacionin në fuqi, pasi që aktualisht në Kosovë nuk lejohet që të regjistrohen veturat më të vjetra se 10 vjet, raporton Demokracia.com.

Po ashtu, Qeveria ka bërë të ditur se sipas vendimit, automjetet me targa të regjistrimit të Serbisë që paraqiten për kalim të kufirit shtetëror dhe kanë për qëllim të lëvizin në territorin e Republikës së Kosovës, duhet të kenë të vendosur ngjitësin në pjesën e simboleve dhe emërtimit shtetëror, nga data 01.08.2022. Mekanizmi i tillë do të vlejë deri më 31.10.2022.

Në lidhje me çështjen e targave, Mirosllav Lajçak theksoi se kryeministri Albin Kurti shumë shpejt do të dalë me një njoftim.

Njoftimi i plotë i Zyrës së Kryeministrit, pa ndërhyrje:

Qeveria e Republikës së Kosovës ka zhvilluar mbledhje elektronike në të cilën ka miratuar vendimin për të mundësuar regjistrimin e automjeteve me targa RKS për të gjitha automjetet e pajisura me targat “PR”, “KM”, “PZ”, “GL”, “UR”, “PE”, “DA” apo “ĐA”, si dhe vendimin për kalimin e kufirit shtetëror nga qytetarët me dokumente personale të lëshuara nga autoritetet e Serbisë.

Me vendimin e parë të miratuar nga Qeveria e Republikës së Kosovës në mbledhjen e sotme, është mundësuar që pronarëve të automjeteve të pajisura me targa “PR”, “KM”, “PZ”, “GL”, “UR”, “PE”, “DA” apo “ĐA” nga 10 qershori 1999 deri më datë 21 prill 2022, t’u mundësohet regjistrimi i mjeteve me targa RKS. Sipas këtij vendimi, regjistrimi do të fillojë me datë 01.08.2022 dhe do të zgjasë deri më 31.09.2022. Vendimi ka karakter të papërsëritshëm pas përfundimit të periudhës së vlefshmërisë. Vendimi obligon Ministrinë e Punëve të Brendshme që të ndërmarrë të gjitha veprimet dhe masat e nevojshme me qëllim të realizimit të këtij procesi.

Miratimin e kabinetit qeveritar e mori edhe vendimi sipas të cilit çdo person që paraqitet për kalim të kufirit shtetëror me dokument të identifikimit personal të lëshuar nga autoritetet e Serbisë, të pajiset në pikë-kalimet kufitare me një fletë-deklarim që përkohësisht e zëvendëson përdorimin e dokumentit të tillë. Fletë-deklarimi do të krijojë bazë për qarkullim në territorin e Republikës së Kosovës dhe për shfrytëzim brenda institucioneve shtetërore.

Gjithashtu, sipas vendimit, automjetet me targa të regjistrimit të Serbisë që paraqiten për kalim të kufirit shtetëror dhe kanë për qëllim të lëvizin në territorin e Republikës së Kosovës, duhet të kenë të vendosur ngjitësin në pjesën e simboleve dhe emërtimit shtetëror, nga data 01.08.2022. Mekanizmi i tillë do të vlejë deri me 31.10.2022.

Ky mekanizëm është pa paragjykim ndaj afatit maksimal të qëndrimit të automjeteve të tilla në territorin e Republikës së Kosovës. /Demokracia.com/

Të ngjashme