Kaosi politik i krijuar rreth dilemës së dorëheqjes nga pozitat ekzekutive për ata që tashmë kanë marrë mandatin si deputetë, ka adresën te Ligji për Qeverinë. Ky ligj, i hartuar nga zyra e Albulena Haxhiut, ish-ministre e drejtësisë dhe aktualisht e propozuar për Kryetare Kuvendi nga Vetëvendosja, përmban mospërputhje nenesh që kanë shkaktuar konfuzion, e çoroditje të sistemit juridiko-politik të vendit.

Ligji për Qeverinë është ndër ligjet e rralla që nuk u kontestua në Gjykatën Kushtetuese, e që për autore ka zyrën e ish-ministres Haxhiu. Ministria e udhëhequr nga Albulena Haxhiu synonte reformim të thellë në sistemin e drejtësisë, duke përfshirë Vettingun, Byronë për Konfiskimin e Pasurisë dhe reformën në Këshillin Prokurorial. Pavarësisht retorikës së saj të fuqishme, zyra e saj nuk arriti të përpilonte një ligj të rëndësishëm që do të kalonte filtrat e Gjykatës Kushtetuese dhe do të sillte përfitime konkrete për qytetarët. Rezultati? Kaos dhe mungesë progresi.

Haxhiu Kryetare Kuvendi?

Albulena Haxhiu është propozuar për Kryetare Kuvendi. Megjithatë, figura e saj mbetet e diskutueshme. Ndryshe nga Glauk Konjufca apo deputetët e tjerë, Haxhiu është një militante-aktiviste e Vetëvendosjes, e cila nuk ka arritur të adoptojë qasje institucionaliste gjatë mandatit të saj si ministre. Kritikat ndaj sistemit gjyqësor dhe protestat para ministrisë së drejtësisë, edhe pse vetë e udhëhiqte atë, e përforcojnë imazhin, e vlerën kryesore të saj; aktiviste e palëkundur e Vetëvendosjes.

Por, a është kjo mjaftueshëm për të udhëhequr Kuvendin?

Dy dështime për Albulena Haxhiun

Pavarësisht se ditëve të fundit kanë qenë të bindur se i kanë numrat, po del se kanë mashtruar.

Lëvizja Vetëvendosje aktualisht i ka 57 vota në Kuvendin e Kosovës.

Propozimi i VV-së për kryteare të Kuvendit ka dështuar dy herë radhazi.

Albulena Haxhiu në dy radhët ka marrë 57 vota.

Votë pro pati deputeti Veton Berisha, përderisa Duda Balje nuk mori pjesë fare në votim.

Nisma Socialdemokrate ka abstenuar, përderisa LDK-ja votoi kundër. PDK-ja nuk mori pjesë fare në votim.

Faton Peci e Glauk Konjufca, në dy adresime të ndara, e lutën opozitën në një formë, që ta votojnë kandidaturën, pasi iu takon me Kushtetutë.

“Propozimi ynë është padyshim i njëjtë ,është znj.Albulena Haxhiu. Është një e drejtë e partisë fituese, që e kodifikon ushtetuta. Kështu që iu kisha lut, si kolegë, shumë prej juve me shumë mandate në Kuvend, ta mbështesni këtë propozim, sepse vetëm kështu nuk bëhemi pjesë e bllokimi të themelimit të institucioneve. T’i thirrim arsyes të gjithë, që ta votojmë, e të shkojmë në faza të tjera” – tha Konjufca, transmeton Nacionale.

“Kemi ba përpjekje për të zgjedhur kryetarin e Kuvendit, është e rëndësishme që të dihet se e drejta për zgjedhjen e kryetarit të Kuvendit i takon vetëm grupit më të madh parlamentar. I bëj thirrje që most ë vonojmë vendin për 48 orë në ardhje, ose 4 ditë të tjera, për shkak se kryetari i Kuvendit i takon VV-së. Është në dorën e tyre që të aprovojmë propozimin e VV-së për kryetar të Kuvendit, në të kundërtën nuk mundemi me ec tutje. Do t’i kemi numrat për qeveri. Negociatat vazhdojnë”, tha Faton Peci, raporton Nacionale.

Në anën tjetër, kryetari i PDK-së, Memli Krasniqi, dhe shefja e grupit parlamentar të LDK-së, Hykmete Bajrami, kanë bërë të ditur se nuk kanë vote për kandidaten e VV-së.

“Propozimi për kryetarin e Kuvendit i takon grupit më të madh, por kjo nuk është obligative që ta votojnë këdo që propozojnë. As në të kaluarën nuk ka ndodh, e nuk ndodh as tash. Le të provojnë me gjet kandidat tjetër. I takon VV-së që kryetari i saj ta bëjë shumicën”, tha Krasniqi.

Kurse, AAK-ja ka bërë të ditur se votë ka vetëm për Shqipe Selimin dhe Saranda Bogujevcin.

Pak optimizëm VV-së ia dha Fatmir Limaj.

“Fillimet i kanë vështirësitë e veta, sot është bërë hap i rëndësishëm me votimin e raportit. Ishte veprim absurd ajo që ndodhi për ato dy ditë. E panevojshme. Tanimë jemi deputet. Shumë shpejt edhe këto tjerat do të përfundojnë. Mbetet që të konstituohet Kuvendi”, tha Limaj.

Mbetet të shihet se cila do të jetë rruga e pushtetit drejt sigurimit të votave.

Seanca e radhës do të mbahet të hënën në orën 15:00./Nacionale