Khaby Lame ka kaluar zyrtarisht adoleshenten e megapopullarizuar, Charli D’Amelio, duke u bërë profili më i ndjekur në TikTok.

Mjeshtri i videokomedisë së shkurtër tani (kur po e publikojmë artikullin) ka 143.3 milionë ndjekës në këtë rrjet social duke e tejkaluar D’Amelian (e cila aktualisht ka 142.5 milionë).

Lame ka lindur në Senegal dhe familja e tij u shpërngul kur ai ishte njëvjeçar në Chivasso të Italisë. Ai e hapi kanalin në TikTok në mars të vitit 2020 dhe asokohe ndau videon e tij të parë komike, pasi u pushua nga puna në fabrikë në ditët e para të pandemisë së coronavirusit.

Videot komike të 22-vjeçarit kanë fituar një popullaritet të jashtëzakonshëm dhe ai është bërë një nga krijuesit më të njohur dhe më të dashur të përmbajtjes TikTok në botë.

Mimika e fytyrës dhe gjuha e trupit të Lame (videot e tij zakonisht nuk përfshijnë dialog) kanë lejuar që përmbajtja të jetë tërheqëse në të gjithë botën dhe ai ka zhvilluar një specialitet të videoreagimit dhe mashtrimet absurde.

“Që nga fëmijëria, kam qenë i apasionuar pas argëtimit dhe për t’i bërë njerëzit të qeshin dhe i jam mirënjohës TikTokut që më ofroi një skenë globale për të ndarë pasionin tim me pjesën tjetër të botës”, kishte deklaruar Lame në gusht të vitit 2021, kur kaloi 100 milionë ndjekës.

Siç ka thënë vet, frymëzimet për videot e tij përfshinin serinë komike “Prince of Bel Air” dhe Ëill Smith, pastaj Eddie Murphy, aktori francez Omar Sy dhe filmat vizatimorë.

I pyetur se për cilën video ishte më krenar, në një pyetje dhe përgjigje me TikTok verën e kaluar, Lame u përgjigj: “Nuk kam ndonjë të veçantë. I dua të gjitha videot e mia dhe të gjitha më kanë bërë krenarë”.

Krahas bazës së fansave në TikTok, Khaby Lame ndiqet nga më shumë se 78 milionë ndjekës në Instagram.