Zëvendës-Prokurori i Specializuar Ward Ferdinandusse, ka publikuar në llogarinë e tij në “Linkedin” një video të shkurtër, ku përmes disa sekuencave të shkëputura propagandistike, synon të tregojë rrjedhën e proceseve gjyqësore të ish-ushtarëve të UÇK-së, në Tribunalin Ndërkombëtar për ish-Jugosllavinë, shkruan Demokracia.com.
“Për ata që janë të interesuar për historikun dhe sfidat e Dhomave të Specializuara të Kosovës, rekomandoj të shikojnë këtë video të shkurtër rreth hetimeve dhe ndjekjeve penale të ICTY-së për krimet në Kosovë, të realizuar nga SENSE- Qendra e Drejtësisë Tranzicionale”, thuhet në postimin e prokurorit Ward Ferdinandusse.
Profesori Gentian Zyberi i cili ishte pjesë e ekipit të Ramush Haradinajt dhe Fatmir Limajt në Hagë, i është kundërpërgjigjur prokurorit Ward Ferdinandusse në postimin e tij.
Tri nga pretendimet kryesore të paraqitura në këtë video, janë rrëzuar nga Gentian Zyberi i cili tani është edhe profesor në Universitetin e Oslos.
Ai ka treguar se Serbia i ka dhënë shumë mbështetje Tribunalit Penal Ndërkombëtar për ish-Jugosllavinë në hetimin kundër ish-komandantëve të UÇK-së e që në videon e publikuar nga Ward Ferdinandusse, pretendohet e kundërta, ku thuhet se Serbia nuk e mbështeti shumë TPNJ-në.
Sipas Zyberit, dështimi i UNMIK-ut dhe EULEX-it në hetimin e krimeve të luftës në Kosovë, nuk mund t’i faturohet shtetit e as qytetarëve të Kosovës.
“UNMIKU dhe më vonë EULEX-i (misioni më i madh i BE-së për Sundimin e Ligjit ndonjëherë) mund të fajësohen për moskryerjen e punës së tyre siç duhet në hetimin dhe ndjekjen penale të krimeve të luftës në Kosovë. Dhe duke parë prapa, fajësimi i punës së tyre të dobët i “shoqërisë fisnore” të prapambetur kosovare (siç kanë bërë del Ponte dhe të tjerë), është një kujtesë e gjuhës koloniale”, thuhet ndër të tjera në reagimin e Gentian Zyberit.
Reagimi i plotë dhe pa ndërhyrje i Gentian Zyberit në postimin e Ward Ferdinandusse:
Zbulim i plotë – Unë isha pjesë e Ekipit të Mbrojtjes në të dyja rastet (Limaj dhe Haradinaj). Videoja e lidhur më poshtë është shumë e anshme dhe selektive në atë që nxjerr në pah. Tre argumentet kryesore të paraqitura në video janë:
1. Autoritetet serbe nuk e ndihmuan shumë TPNJ-në me hetimet. E vërteta është se ata i dhanë shumë mbështetje TPNJ-së, veçanërisht në rastin Haradinaj, i vetmi person (nga 161 të akuzuar) që është gjykuar dy herë para TPNJ-së dhe është shpallur i pafajshëm të dyja herët.
2. Dëshmitarët e brendshëm ndryshuan dëshminë e tyre. Ky argument është paraqitur me disa klipe selektive. Ekziston një ndryshim midis informacionit të dhënë si mburrje për meritat (ka shumë kujtime të shkruara pas luftës, ku njerëz të ndryshëm marrin merita për gjëra të ndryshme dhe për të qenë përgjegjës për këtë apo atë) dhe dëshmisë para TPNJ-së, të dhënë nën betim dhe të nënshtruar ndaj një marrjeje të fortë në pyetje. Shumë prova të sjella nga Prokurori nuk i rezistuan shqyrtimit të pyetjeve të Mbrojtjes. Por pati dënime nga TPNJ-ja në të dyja rastet. Kjo as nuk përmendet!
3. Unmiku nuk bashkëpunoi. UNMIKU mund të fajësohet për shumë gjëra, por jo për bashkëpunimin me ICTY-në. UNMIKU dhe më vonë EULEX-i (misioni më i madh i BE-së për Sundimin e Ligjit ndonjëherë) mund të fajësohen për moskryerjen e punës së tyre siç duhet në hetimin dhe ndjekjen penale të krimeve të luftës në Kosovë. Dhe duke parë prapa, fajësimi i punës së tyre të dobët i “shoqërisë fisnore” të prapambetur kosovare (siç kanë bërë del Ponte dhe të tjerë), është një kujtesë e gjuhës koloniale! Ky ishte një justifikim shumë i lehtë si për UNMIKU-n ashtu edhe për EULEX-in. Sikur ta kishin bërë punën e tyre siç duhet, rezultatet mund të kishin qenë të ndryshme.
