Ambasada e Francës në Kosovë përmes një reagimi ka kërkuar nga Kosova dhe Serbia që të përmbahen nga çdo veprim i njëanshëm që mund të nxisë tensione.
Ky reagim në rrjetin social Twitter, vjen pas vendimit të Kosovës për të aplikuar që të bëhet anëtare e Këshillit të Evropës, përcjell Demokracia.com.
“Vendimi për të aplikuar në Këshillin e Evropës i takon Kosovës si shtet sovran. Kosova është e destinuar të bëhet anëtare. Prioriteti aktual është rinisja e dialogut ndërmjet Serbisë dhe Kosovës që do të kontribuojë në afrimin e tyre evropian dhe në stabilizimin afatgjatë të Ballkanit. Ne u bëjmë thirrje të dyja palëve që të investojnë plotësisht në këtë dhe të përmbahen nga çdo veprim i njëanshëm që mund të nxisë tensionet”, thuhet në këtë reagim.
La décision de candidater au Conseil de l’Europe appartient au Kosovo comme Etat souverain. Le Kosovo a vocation à en devenir membre. La priorité du moment est la relance du dialogue entre la Serbie et le Kosovo 1/2
— France au Kosovo 🇲🇫 (@FranceauKosovo) May 13, 2022
qui contribuera à leur rapprochement européen et à la stabilisation durable des Balkans. Nous appelons les deux parties à s’y investir pleinement et à s’abstenir de toute action unilatérale susceptible d’alimenter les tensions 2/2
— France au Kosovo 🇲🇫 (@FranceauKosovo) May 13, 2022
Lidhur me këtë çështje, të premten ka reaguar edhe Pierre Cochard, ambasadori i Francës në Serbi i cili ka thënë se nuk mbështesin veprimin e fundit të Kosovës.
I pyetur nëse Franca do të votojë për hyrjen e Kosovës në Këshillin e Evropës, ambasadori Cochard tha se për momentin nuk është ngritur një pyetje e tillë, meqë do të kërkohet mendimi i Asamblesë Parlamentare dhe pastaj të rishqyrtohet kandidatura, përcjell Demokracia.com.
“Prioriteti i Francës është të bëjë gjithçka, së bashku me partnerët tanë evropianë, veçanërisht me Gjermaninë, për të vazhduar dialogun mbi baza të qëndrueshme dhe kjo është ajo që është urgjente. Pra, ne besojmë se lëvizjet e njëanshme nuk janë të dobishme dhe mund të mbytin një proces tashmë të ndërlikuar. e cila nuk ka përparuar shumë muajt e fundit”, është shprehur Cochard.
Ndryshe, Kosova të enjten ka aplikuar zyrtarisht që të bëhet anëtare e Këshillit të Evropës. Sidoqoftë, deri më tani nuk dihet se kur do të vendoset se a do të pranohet ose jo./Demokracia.com/