Katër bimët e mëposhtme, të përshtatshme për dekorimin e mjediseve të brendshme, janë pastrueset më të shkëlqyera ndër gjithë të ngjashmet e tyre.

Ato thithin dioksid karboni dhe disa ndotës përmes gjetheve dhe rrënjëve, duke lëshuar oksigjen.

NASA kreu një studim të quajtur “NASA Clean Air Study”, ku zbuluan që disa bimë janë shumë efektive në filtrimin e ajrit të mbyllur, sidomos në ambiente si hapësirat e vogla ose stacionet hapësinore. Ata rekomanduan të paktën 1 bimë për çdo 9 m² për të përmirësuar ndjeshëm cilësinë e ajrit.

Si i pastrojnë ajrin lulet dhe bimët?

Përmes fotosintezës: Bimët thithin dioksid karboni (CO₂) dhe lëshojnë oksigjen (O₂), duke përmirësuar nivelin e oksigjenit në mjedis.

Filtrimi i ndotësve: Disa bimë thithin ndotës të ajrit si formaldehidi, benzene, trikloroetileni, tolueni dhe ksileni – këto gjenden në bojëra, mobilje, pastrues, dhe materiale ndërtimi.

Mikrobet në rrënjë: Rrënjët dhe mikroorganizmat në tokë ndihmojnë në zbërthimin e ndotësve në substanca më pak të dëmshme.

Zambaku i Paqes (Spathiphyllum) çel lule të bardha, si pak bimë të mjediseve të brendshme.

Kujdesi: Dheu duhet të jetë pothuajse i lagësht dhe duhet ushqyer çdo muaj me fertilizues nga pranvera në vjeshtë. Ndalo fertilizusin dhe lëre dheun më të tharë në dimër. Pastro gjethet herë pas here me një copë të lagur për të hequr ndonjë gjurmë të insekteve.

Palma Areka (Chrysalidocarpus lutescens) njihet si palma e verdhë ose palma flutur.

Kujdesi: Rrënjët duhet të qëndrojnë në mjedis të lagësht dhe spërkati shpesh gjethet. Hidhi çdo muaj, përveç muajve të dimrit, fertilizues të lëngët. Hiq degët e thara rregullisht.

Palma Zonjë (Rhapis excelsa) është një nga bimët më të mira për të pastruar ajrin e mjediseve të brendshme dhe është shumë rezistente ndaj shumicës së kandrrave. Ajo ka degë 15-28 cm të gjera me gjethe të gjelbra me shkëlqim.

Kujdesi: Ujite bollshëm, sidomos gjatë pranverës dhe verës. Ushqeje çdo muaj me fertilizues sipas këshillave në ambalazh. Majat e gjetheve mund të priten po të bëhen të kafëta.

Fikusi Gomë (Ficus robusta) është një bimë, familja e të cilit dekoron mjediset tona prej kohësh, me gjethe të plota, të lëmuara, në ngjyrë të errët të gjelbër. Ai toleron mungesën e dritës dhe temperaturat e ulëta dhe është shumë i mirë për të hequr toksinat kimike nga ajri i brendshëm, më i miri nga gjithë familja e fikuseve.

Kujdesi: Ujite rregullisht nga mesi i verës deri në fillim të dimrit, por lëre dheun të thahet pak midis ujitjeve. Ujite me interval gjatë pjesës tjetër të vitit, këto bimë vuajnë kur ujiten më shumë seç kanë nevojë. Ushqehet çdo muaj me fertilizues të lëngshëm vetëm gjatë verës.

Disa këshilla

Fshiji gjethet rregullisht nga pluhuri – ndryshe, nuk thithin ajër siç duhet.
Mos i ujit me tepri – shumica e bimëve të brendshme vuajnë më shumë nga uji i tepërt sesa nga mungesa.
Ndriçimi është çelësi – kontrollo a i përshtatet vendi që ke për bimën.