Ministri i Punëve të Brendshme, Xhelal Sveçla shfrytëzoi rastin që pak orë para mbajtjes së protestës s ëish-ushtarëve të Ushtrisë Çlirimtare të Kosovës t’i sulmojë mediat, por edhe vetë veteranët. Shkrimi u shpërnda më të madhe nga Lëvizja Vetëvendosje, madje edhe në faqen zyrtare të partisë në pushtet. Por, përveç figurave politike, gazetarëve, opinionistëve – VV-së i reagon edhe qytetarët.
“Mbetet të shihet sot nëse qytetarët e Republikës së Kosovës do të ruajnë dinjitetin personal dhe pozicionin e shtetit, apo do të bien në këtë grackë të luftës hibride të Serbisë.” – kjo është pjesa më skandaloze e shkrimit të ministrit Sveçla.
Megjithatë, me “krenari”, VV-ja e publikoi të plotë edhe në faqen zyrtare.
Komentuesit
Lëvizja Vetëvendosje që njihet për pëlqime të shumta në rrjete sociale, këtë herë mori komente kritike.
Komentuesit në Facebook, i kanë përmendur audioincizimet e publikuara nga Nacionale, ku dëgjohet biseda mes shefes së deputetëve të këtij subjekti politik dhe Sllavko Simiqit të Listës Serbe.
Madje, ka pasur të tillë edhe që e kanë konsideruar si propagandë shkrimin e ministrit Sveçla, dhe shpërndarjen më pas nga VV-ja.
“Për propagandë vshtirë o me jau kalu kush n’garë jeni me ato të Koresë së Veriut.” – ka shkruar një komentues.
Dënohet gjuha e Sveçlës
Ndër të parët që ka reaguar ka qenë kryetari i LDK-së, Lumir Abdixhiku. Ai ka vlerësuar se ky është nivel i ri i ulët i politikëbërjes në Republikë.
“Deklaratë e pamatur, nxitëse e ofenduese e Ministrit të Punëve të Brendshme. Etiketimi i pabazë i gazetarëve e ofendimi i turpshëm i luftëtarëve – edhe nëse s’pajtohemi me ta – është nivel i ri i ulët i politikëbërjes në Republikë. Të injorosh komunikimin e shefes së partisë me një terrorist, e të ndërtosh gjuhë nxitëse e përplasëse me plot imagjinatë është maskaradë. Kjo gjuhë, e dhënë tani, kërkon përplasje. Kërkon dhunë e kërkon krizë. Duket se mendja e pushtetit është mu në dhunë e krizë.” – ka shkruar Abdixhiku.
Edhe më i ashpër ka qenë kryetari i PDK-së, Memli Krasniqi.
“Qeveria kërkon përplasje! Përmes një deklarate skandaloze dhe fyese ndaj veteranëve dhe gazetarëve, nxitëse mbi të gjitha – Qeveria e Albin Kurtit po kërkon përplasje. Vetëm një Qeveri e dështuar, e papërgjegjshme dhe pa fijen e ndërgjegjes, përmes veprimeve të saj, kërkon dhunë në mesin e popullit të saj. Veteranët kanë paralajmëruar sot protestë paqësore, për të kërkuar respekt dhe dinjitet nga një Qeveri e cila po i diskriminon në çdo hap e vendim. Pikërisht, për ta eskaluar këtë protestë që veteranët tanë të përballen me policinë, vëllezërit dhe motrat e veta, një ministër pa karakter si Xhelal Sveçla del me fyerje dhe nxitje të tilla.” – ka shkruar Krasniqi.
Ndërkohë, ndaj shkrimit të Sveçlës, ka reaguar edhe shoqëria civile. Drejtori i KDI-së, Ismet Kryeziu, kërkoi shkarkimin e Ministrit të Punëve të Brendshme, Xhelal Sveçla.
Ai ka bërë me dije se për shkak të gjuhës së përdorur sot në çdo shtet demokratik do të ndodhte shkarkimi i ministrit.
“Në një shtet demokratik, ku fjala ka peshë dhe përgjegjësi, sot do duhej të shkarkohej ministri i Punëve të Brendshme, Xhelal Sveçla. Por nuk ka si të shkarkohet një ministër, përmes të cilit Kryeministri ka zgjedhur që me gjuhë kërcënuese dhe nxitëse për konflikt civil, t’u drejtohet qytetarëve të Republikës.” – ka shkruar Kryeziu.