Partia Demokratike e Kosovës i është përgjigjur pozitivisht ftesës së LVV-së për takimin konsultativ, lidhur me konstituimin e institucioneve.
Këtë e ka bërë të ditur për Demokracia.com zëdhënësi i PDK-së, Avni Bytyqi i cili tha se qëndrimet e tyre do i bëjnë publike gjatë takimit.
“PDK-ja do të marrë pjesë në takimin e së hënës. Si parti kryesore opozitare, qëndrimet tona rreth formimit të institucioneve do t’i bëjmë të njohura në takim”, ka thënë ai.
Lëvizja Vetëvendosje të enjten ka ftuar PDK-në, LDK-në dhe AAK-në për takime lidhur me formimin e institucioneve pas certifikimit të rezultatit zgjedhor.
Kryetari në dorëheqje i LDK-së, Isa Mustafa ka thënë se kjo parti gjithnjë ka qenë pro bisedimeve dhe dialogut, derisa s’ka përmendur nëse do pranojnë ftesën e VV-së.
Ndërsa deri më tani vetëm AAK-ja nuk e ka bërë të ditur qëndrimin e saj lidhur me ftesën e Kurtit për takim.