Kosovari Xherdan Shaqiri e ka lavdëruar Lionel Messin, i cili iu bashkua atij në ligën amerikane – MLS.
Shaqiri thotë se futbollisti argjentinas e ka transformuar totalisht Inter Miamin që prej zbarkimit të tij.
Messi mungoi mbrëmë në fitoren e Chicago Fire ndaj Inter Miamit me rezultat 4:1, ndërsa futbollisti nga Zhegra e Gjilanit ishte protagonist me dy gola të shënuar.
31 vjeçari kosovar beson se ekipi nga Florida do të këndellet, mbi të gjitha kur e ka në skuadër shtatë herë fituesin e Topit të Artë.
“Kur luan Messi, të gjithë në ekip janë më të mirë dhe kjo është arsyeja se përse ai është më i miri në botë në këtë moment”, deklaroi Shaqiri për mediat amerikane.
“Miami ka pamje tjetër, ka dukje tjetër me Messin në ekip. Kur nuk luan ai, kjo vërehet, siç u pa në ndeshjet e fundit”, vazhdoi ish-futbollisti i Baselit, Bayern Munichut, Interit, Stoke Cityt, Liverpoolit e Lyonit.
Kujtojmë se argjentinasi ka pësuar lëndim dhe ka munguar në ndeshjet e fundit.