Zëvendëskryeministri i Kosovës, Besnik Bislimi, nesër do të udhëtojë drejt Brukselit për të diskutuar për çështjen e targave ilegale serbe.

Bislimi pritet të takohet me emisarin e BE-së për dialogun Kosovë-Serbi, Miroslav Lajçak.

Demokracia.com këtë informacion e ka marrë nga burime brenda Zyrës së Kryeministrit.

Ky është edhe një shans për të diskutuar për targat, pas zhvillimeve dramatike të ditës së hënë.

Pas dështimit të arritjes së një marrëveshjeje në takimin disa orësh të Kurtit me presidentin serb, Aleksandër Vuçiq, ai mbrëmë e ka pranuar kërkesën e ambasadorit amerikan, Jeff Hovenier, për ta shtyrë zbatimin e vendimit për gjobitjen e qytetarëve me targa ilegale.

Kurti ka njoftuar se bëhet fjalë për një shtyrje 48-orëshe.

“E falëndëroj Ambasadorin Hovenier për përkushtimin dhe angazhimin e tij. E pranoj kërkesën e tij për një shtyrje 48 orëshe për dhënien e gjobave për targat ilegale KM (dhe të tjera). Jam i lumtur të punojë me SHBA-në dhe me BE-në për të gjetur një zgjidhje gjatë dy ditëve të ardhshme”, ka shkruar Kryeministri në Twitter.

Ky vendim erdhi pasi Ambasada amerikane në Prishtinë ka kërkuar nga Qeveria e Kosovës ta shtyjë për 48 orë dhënien e gjobave për qytetarët që vozisin automjetet me targat që Serbia ilegalisht i lëshon për rajone të Kosovës.

SHBA ka thënë se kanë kërkuar këtë shtyrje për t’i lejuar BE-së dhe Shteteve të Bashkuara të angazhojnë më tej palët për të gjetur një zgjidhje.

“Shtetet e Bashkuara janë të shqetësuara se liderët e Kosovës dhe Serbisë nuk arritën sot të arrijnë një marrëveshje për zgjidhjen e krizës aktuale në Kosovë. Kemi kërkuar nga Qeveria e Kosovës që të shtyjë për 48 orë vendosjen e gjobave për t’i lejuar BE-së dhe Shteteve të Bashkuara të angazhojnë më tej palët për të gjetur një zgjidhje”, është shprehur ambasadori Jeff Hovenier.

The U.S. is concerned that the leaders of Kosovo and Serbia were unable to reach an agreement today. Read my full statement: pic.twitter.com/tre1E5lO9d

— Ambassador Jeff Hovenier (@USAmbKosovo) November 21, 2022

Kërkesa e SHBA-së erdhi pasi gjatë ditës së djeshme në Bruksel në takimin maratonik trilateral BE-Kosovë-Serbi, nuk u arrit marrëveshje në lidhje me targat.

Përfaqësuesi i Lartë i Bashkimit Evropian për Siguri dhe Politikë të Jashtme, Josep Borell, deklaroi se ishte Kryeministri i Kosovës, Albin Kurti, ai i cili nuk u pajtua me propozimet e BE-së për një zgjidhje për rrugën para për çështjen e targave.

BE-ja kishte propozuar që Kosova të mos japë gjoba për targat ilegale e të vazhdojë me qortime, ndërsa Serbia të mos lëshojë më targa me akronime të qyteteve të Kosovës./Demokracia.com/