Ndërsa më vonë, ai pritet të takohet edhe me zëvendëskryeministrin kosovar, Besnik Bislimi, njëherit shef i ekipit negociator të Kosovës në dialogun për normalizimin e marrëdhënieve ndërmjet Prishtinës dhe Beogradit.

Para vizitës në Prishtinë, ai të hënën qëndroi edhe në Beograd, ku takoi presidentin e Serbisë, Aleksandër Vuçiç, por edhe shefin e ekipit negociator të palës serbe, Petar Petkoviç, me të cilët diskutoi për “hapat e ardhshëm” në procesin e dialogut nën ndërmjetësimin dhe kujdesin e BE-së.

“Me të mbërritur në Beograd sot në mëngjes, u takova me Vuçiçin. Në diskutimin tonë, u fokusuam në perspektivën strategjike për vitin 2024, bëmë një bilanc mbi gjendjen e lojës në dialog dhe folëm për hapat e ardhshëm në normalizimin e marrëdhënieve me Kosovën”, shkroi diplomati sllovak në platformën X të hënën.

Lajçaku vjen në Beograd dhe Prishtinë në kuadër të përpjekjeve për të përcaktuar shpejtësinë e dakordimit për modalitetet e zbatimit të Marrëveshjes Bazë (Bruksel, 27 shkurt) dhe Aneksit të Implementimit (Ohër, 18 mars) për normalizimin e marrëdhënieve Kosovë-Serbi.

Kryeministri Kurti dhe presidenti Vuçiç u takuan për herë të fundit në shtatorin e vitit të kaluar në Bruksel, ndërsa në tetor u takuan veç e veç me krerët e shteteve kryesore evropiane pas “stuhisë diplomatike” të emisarëve të Gjermanisë, Francës dhe Italisë, në përpjekje për t’i shtyrë Kosovën dhe Serbinë drejt zbatimit të marrëveshjeve dhe zbutjen e tensioneve.