Papa i ndjerë kërkoi ta afronte Kishën Katolike më pranë njerëzve dhe të shkëputej nga tradita përmes gjesteve simbolike dhe qëndrimeve të guximshme ndaj çështjeve të debatueshme.
I njohur si “Papa i Popullit”, Papa Françesku fitoi popullaritet përtej komunitetit të gjerë katolik që udhëhoqi, duke mbrojtur të varfrit dhe të përjashtuarit gjatë papatit 12-vjeçar.
Papa i ndjerë ishte i njohur për avokimin në mbështetje të më të pambrojturve të shoqërisë dhe për qëndrimet e tij të guximshme ndaj çështjeve si ndryshimet klimatike, etja e korporatave për fitim dhe lufta midis Izraelit dhe Hamasit.
Mbretërimi i tij si kreu i Kishës Katolike u përcaktua nga dëshira për ta afruar kishën me njerëzit, për të theksuar rolin e priftërinjve si shërbëtorë dhe për të ndërtuar “një kishë të varfër për të varfrit”, transmeton Telegrafi.
Ky ishte një mision që ai e përshkroi vetëm pak ditë pas zgjedhjes në vitin 2013 dhe që u përpoq ta përfshinte gjatë gjithë mandatit, madje edhe në funeralin e tij, duke thjeshtuar dhe shkurtuar ritet dhe ritualet tradicionale të Vatikanit.
Euronews ju sjell disa nga momentet simbolike të papatit që pasqyrojnë përulësinë, thjeshtësinë dhe misionin për të reformuar papatin.
1.Shkaktoi polemika duke larë këmbët e grave të dënuara
Në vitin 2013, Papa Françesku e shkeli traditën duke larë këmbët e 12 të burgosurve në qendrën e paraburgimit për të rinjtë “Casal del Marmo” në periferi të Romës.
Riti tradicional përfaqëson aktin e fundit të përulësisë së Jezu Krishtit ndaj dishepujve të tij.
Por, ishte vendimi i Papës për të përfshirë dy gra të reja, si dhe myslimanë, në këtë ritual që shkaktoi zemërimin e tradicionalistëve në Kishën Katolike Romake.
Në atë kohë, zëdhënësi i Vatikanit, Federico Lombardi, tha se ky vendim u mor në një situatë “ku përjashtimi i vajzave do të kishte qenë i papërshtatshëm, duke pasur parasysh qëllimin e thjeshtë të dërgimit të një mesazhi dashurie për të gjithë”.
2. Puthi këmbët e liderëve të Sudanit të Jugut
Në vitin 2019, Papa Françesku puthi këmbët e liderëve të Sudanit të Jugut gjatë një ‘takimi shpirtëror’ historik në Vatikan – një gjest të paprecedentë me qëllimin për t’i inkurajuar liderët të mbështesin paqen në mes të luftës civile të përshkallëzuar në vend.
“Po dridheshim gati, sepse kjo gjë nuk ka ndodhur më parë, përveç në kohën kur Jezusi iu ul këmbëve dishepujve të tij për t’i larë”, tha presidenti i Sudanit të Jugut, Salva Kiir, në një intervistë për CNA pas momentit.
Në një homazh pas vdekjes së Papës, Kiir tha se ai moment ishte një “pikë kthese për ne, partnerët e paqes”.
Papa Françesku vizitoi Sudanin e Jugut në vitin 2023, ku kërkoi zbatimin e marrëveshjes së paqes së vitit 2018 dhe bëri thirrje për dorëzimin e armëve dhe për liderët që të marrin përgjegjësi për korrupsionin.
3. Dhuroi një Lamborghini të punuar me porosi
Në vitin 2017, prodhuesi italian i veturave Lamborghini i dhuroi Papës Françesku automjetin sportiv Huracan RWD, në ngjyrat e bardha dhe ari të flamurit të Vatikanit.
Papa Françesku e bekoi veturën dhe, në vend që ta mbante, e nënshkroi atë dhe kërkoi që të shitej në ankand. Vetura u shit për rreth 809,375 euro.
Paratë u dhuruan për Fondacionin “Ndihmë për Kishën në Nevojë” (Aiuto alla Chiesa che Soffre) për rindërtimin e Rrafshit të Ninives në Irak, Komunitetin Papa Gjon XXIII, dhe “Projekti i Shtëpisë së Papës Françesku” (Progetto Casa Papa Francesco).
Gjatë papatit të tij, 88-vjeçari zgjodhi vetura modeste, shpesh duke shmangur Popemobilin – të cilin e quante “kutia e sardeleve”.
Ai zgjodhi një version të hapur të mjetit, duke thënë famshëm në vitin 2015, “është e vërtetë që mund të ndodhin gjithçka, por le të përballemi me të vërtetën, në moshën time nuk kam shumë për të humbur”.
4. Emëroi gruan e parë për të drejtuar një zyrë të madhe të Vatikanit
Në muajin janar, Papa Françesku njoftoi se Motra Simona Brambilla do të shërbente si prefekte e Dikasterit për Institutat e Jetës së Shenjtë dhe Shoqëritë e Jetës Apostolike, një zyrë e Vatikanit që mbikëqyr urdhra fetarë për burra dhe gra.
Ky hap i paprecedentë pasqyronte qëllimin e Papës për të dhënë më shumë mundësi udhëheqjeje për gratë në Kishën Katolike.
Në vitin 2021, ai gjithashtu lejoi gratë të shërbejnë si lektore dhe ndihmëse, role që deri atëherë ishin ekskluzivisht të rezervuara për burra.
Megjithatë, Papa Françesku nuk shkoi aq larg sa të lejonte që gratë të shuguroheshin si priftëreshë – një temë tepër e debatueshme në Kishë.
5. Solli me aeroplan në Romë, 12 refugjatë nga Greqia
Në një ditë pranverore të vitit 2016, Papa Françesku vizitoi ishullin grek të Lesbos, një nga epiqendrat e krizës së refugjatëve në Evropë.
Papa kaloi rreth pesë orë në ishull dhe, kur po largohej, mori me vete dy familje refugjatësh sirianë nga Damasku dhe Deir ez-Zor.
“Vatikani do të marrë përgjegjësinë për t’i sjellë dhe për t’i mbajtur (ata)”, thuhej në një deklaratë nga zyra e shtypit të Shenjtërisë.
Shpëtimi i 12 refugjatëve nga qendra e ngarkuar e ishullit ishte “një pikë uji në det. Por pas kësaj pike, deti nuk do të jetë më i njëjti”, tha Papa Françesku.
Ky akt simbolik u konsiderua një kritikë ndaj Bashkimit Evropian, i cili kishte zbatuar një politikë për të dërguar migrantët dhe refugjatët mbrapsht në Turqi.
Ky gjest ishte pjesë e përpjekjeve të tij më të gjera gjatë papatit për të theksuar gjendjen e vështirë të refugjatëve dhe kërkuesve të azilit.
Në korrik 2013, udhëtimi i parë papal jashtë Vatikanit ishte në ishullin e largët italian të Lampedusa, pas disa vdekjeve të migrantëve në kalimin fatal mes brigjeve të Afrikës dhe Maltës.
“Ai donte të fillonte një dialog global për t’u bërë të ditur liderëve botërorë se edhe një migrant pa dokumente nuk është diçka për t’u frikësuar”, tha një nga personat që Papa Françesku solli nga Lesbos, Hasan Zaheda, gjatë hospitalizimit të fundit të papës këtë vit.
