Kështu ka bërë me dije një zëdhënëse e Ministrisë së Jashtme pakistaneze, pasi incidenti nxiti tensionet midis dy fqinjëve myslimanë.

Pakistani ka thënë se shkelja e hapësirës ajrore, për të cilën media shtetërore iraniane tha se erdhi pasi raketat iraniane synonin dy baza të grupit militant Jaish al Adl, kishte rezultuar në vdekjen e dy fëmijëve.

Ministri i Jashtëm i Iranit, Amir-Abdollahian, ka thënë se ai goditi militantët në sulme me raketa dhe dron, duke thënë se asnjë shtetas pakistanez nuk ishte në shënjestër.

Sakaq, Pakistani nuk e ka konfirmuar natyrën e shkeljes, apo vendndodhjen e sulmeve.

Vetëm “terroristët” u goditën, ka thënë ministri i Jashtëm iranian në Davos, Zvicër, ku ai po merrte pjesë në Forumin Ekonomik Botëror, duke pretenduar se ata që ishin në shënjestër ishin të lidhur me Izraelin.

Zyrtarët provincialë në Pakistan kanë thënë ndërkaq se dy fëmijë u vranë dhe disa të tjerë u plagosën nga sulmet me raketa pranë kufirit me Iranin.

Shkelja ishte një shkelje e paprovokuar dhe e hapur e sovranitetit të Pakistanit dhe ishte e papranueshme, ka thënë zëdhënësja e Ministrisë së Jashtme të Pakistanit, Mumtaz Zahra Baloch.

Ajo po ashtu ka shtuar se vendi rezervoi “të drejtën për t’iu përgjigjur këtij akti të paligjshëm”.

Pakistani dhe Irani kanë pasur në të kaluarën marrëdhënie të vështira, por sulmet janë ndërhyrja ndërkufitare e profilit më të lartë në vitet e fundit.