Presidentja Vjosa Osmani ka vlerësuar si pozitive deklaratën e Komunitetit të Helsinkit i cili tha se “pasivizimi” i shqiptarëve në Serbi është “një formë e spastrimit etnik përmes mjeteve administrative”.

Përmes një postimi në rrjetin social “Twiter”, Osmani ka thënë se përgjigja e Komunitetit Ndërkombëtar deri më tani ka qenë e pamjaftueshme, andaj duhet bërë më shumë.

“Komuniteti i Helsinkit ka thënë se ‘pasivizimi’ i shqiptarëve në Serbi është ‘një formë e spastrimit etnik përmes mjeteve administrative’. Duhet të respektohen të drejtat e të gjithë qytetarëve në atë pjesë. Përgjigja e komunitetit deri më tani ka qenë e pamjaftueshme. Duhet bërë më shumë!”, ka shkruar ajo.

Osmani po ashtu ka thënë se këtë çështje e ka ngritur në disa raste si brenda ashtu edhe jashtë Kosovës.

Ndërsa ka siguruar se qytetarët e Luginës së Preshevës kanë mbështetjen e plotë të institucioneve të Republikës së Kosovës.

“Unë e kam ngritur këtë çështje në disa raste, si këtu në Kosovë ashtu edhe jashtë saj. Këta qytetarë kanë mbështetjen e plotë të institucioneve të Republikës së Kosovës. Ne do të bëjmë gjithçka që kemi në fuqinë tonë për t’u siguruar që zëri i tyre të dëgjohet’, ka shkruar ajo.

The Helsinki Comm. has said the 'passivation' of Albanians in Serbia is "a form of ethnic cleansing through administrative means".

All citizens must have their basic human rights respected. The int. community's response thus far has been insufficient. More must be done! 1/2

— Vjosa Osmani (@VjosaOsmaniPRKS) July 15, 2021