Kreu i Lëvizjes Vetëvendosje, Albin Kurti dhe u.d e presidentit të Kosovës, Vjosa Osmani nisin sot takimet me partitë politike, pas certifikimit të rezultatit të zgjedhjeve të 14 shkurtit. Kurti dhe Osmani sot gjatë ditës do të takohen me kreun e Partisë Demokratike të Kosovës dhe atë të Aleancës për Ardhmërinë e Kosovës.
Katër ditë më parë në selinë e LDK-së, AAK-së, dhe PDK-së kanë dërguar nga një letër, u.d e presidentit, Vjosa Osmani dhe kreu i LVV-së, Albin Kurti
Kurti dhe Osmani si të parët nga zgjedhjet e 14 shkurtit, kanë kërkuar takim me shefin e LDK-së, atë PDK-së dhe AAK-së në mënyrë që të dakordohen për formimin e institucioneve të reja.
Kreu i LVV-së dhe prijësja e Listës “GUXO” kanë kërkuar nga kreu në detyrë i PDK-së, Enver Hoxhaj që të takohen sot në ora 11:00.
Hoxhaj dhe PDK-ja kanë pranuar ftesën dhe ky takim do të mbahet sot në Kuvendin e Kosovës.
Një takim Osmani dhe Kurti do ta mbajnë edhe me Ramush Haradinajn, kreun e AAK-së.
Në konsultë për formimin e institucioneve të reja, Haradinaj, Kurti e Osmani do të takohen sot në ora 13:30.
Haradinaj ka ftuar mbledhje të kryesisë së partisë të cilën ai e udhëheq, një orë e gjysmë pas takimit me Osmanin dhe Kurtin.
Megjithatë, një takim me Osmanin e Kurtin nuk do ta mbajnë në LDK.
Kryetari i zgjedhur i këtij subjekti, Lumir Abdixhiku nuk është shprehur i gatshëm që të shihet me liderin e LVV-së dhe Osmanin në ditën e parë të punës si kryetar i Lidhjes Demokratike.
Takimi që ishte thirrur për sot në orën 12:30, sipas Abdixhikut mund të mbahet të premten.
“Tani për shkak të rrethanave të tanishme, gjëja e parë që do ta bëj nesër është që do të dal në zyrat e LDK-së. Unë e falenderoj konstruktivitetin e zonjës Osmani dhe Z. Kurti në lidhje me ftesën. Besoj që kjo është qasja e duhur se si duhet të sillemi, por e kam të pamundur për shkak të konsolidimit të organeve tona dhe konsultave të brendshme. Gjithsesi propozoj të premten si datë për takimin eventual në formatin e njëjtë siç është kërkuar”, ka thënë Abdixhiku dje pasi që me shumicë të votave është emëruar kryetar i Lidhjes Demokratike të Kosovës.