Ballkani e ka fituar kryendeshjen e javës kundër Dritës dhe i është afruar edhe më shumë titullit kampion për herë të parë në histori të klubit.

“Portokallezinjtë” triumfuan 3:2 në një ndeshje dramatike ndaj Dritës në stadiumin e qytetit në Suharekë, shkruan Demokracia.com.

Ndonëse iu duhet vetëm një pikë për ta siguruar edhe matematikisht titullin, Ilir Daja, trajneri i Ballkanit thotë se gara nuk ka mbaruar ende, por thotë se skuadra e tij 99 për qind është kampion i Kosovës.

“Në fakt, me diferencën e pikëve që kishim edhe para kësaj loje, ishim të qetë sepse kemi pasur një ecuri fantastike. Përveç rezultateve që ka qenë vetëm një humbje gjatë kësaj periudhe, loja ka qenë garancia që na jepte siguri më të madhe. Sigurisht që nuk ka mbaruar, por 99.9%, me pesë lojë që kanë mbetur, Ballkani jo vetëm që do ta vazhdojë paraqitjen sa më të mirë, por do të mundohet ta përfaqësojë sa më mirë qytetin dhe futbollin e Kosovës në Evropë. Sinqerisht, është një kënaqësi e shtuar sepse drejtuesit e klubit kanë investuar mirë në cilësi dhe sasi. Meritë kanë gjithë trajnerët që kanë punuar në 3-4 vitet e fundit. Meritë ka stafi që ka punuar, dhe Bekim Isufi që ka qenë në pjesën e parë të sezonit”, ka thënë trajneri Daja për Art Sport./Demokracia.com/