Data 28 janar 2024 po afron dhe bashkë me të edhe momenti historik për shqiptarët në Republikën e Maqedonisë së Veriut, ku pritet që për herë të parë një shqiptar të votohet për Kryeministër.
Kandidati tashmë dihet dhe emri i Talat Xhaferit është shpallur nga kryetari i BDI-së, Ali Ahmeti, shkruan Demokracia.com.
Por, vetëm 3 javë para kësaj, tri partitë shqiptare opozitare, që përbëjnë koalicionin Lëvizja Evropiane për Ndryshim (LEN) dhe që mbështeten publikisht nga Lëvizja Vetëvendosje dhe kryeministri Albin Kurti, kanë shpallur bojkotimin e punës së Kuvendit të Maqedonisë së Veriut.
Duket i çuditshëm ky vendim i partive shqiptare, të cilat përbëjnë një grup paralamentar prej 6 deputetësh, 3 nga grupi i Izet Mexhitit që ishte larguar nga BDI, 2 deputetë nga Alternativa dhe 1 deputet nga Lëvizja Besa, sidomos kur dihet se raundi i parë i zgjedhjeve presidenciale të mbahet më 24 prill të vitit 2024, ndërsa raundi i dytë të mbahet së bashku me zgjedhjet parlamentare më 8 maj të vitit 2024.
Arsyeja për këtë vendim është dhënë të premten më 5 janar 2023, në një konferencë të përbashkët para gazetarëve të frontit opozitar shqiptar. LEN, vazhdon të kërkojë që përfaqësuesi i tyre të emërohet në Komisionin Shtetëror Zgjedhor.
“Prej sot grupi parlamentar i LEN-it nuk do të marrë pjesë në punën e Kuvendit gjithnjë deri sa kandidati ynë për KShZ, Abdush Demiri, nuk do të vihet në rend dite në seancë plenare. Ky është vetëm hapi jonë i parë. Nëse edhe pas kësaj kjo shumicë edhe kryetari i Kuvendit vazhdojnë ta sabotojnë të drejtën tonë për anëtarë të KShZ-së, ne do të jemi të detyruar t’i ashpërsojmë masat e kundërshtimit. Se a do t’i bllokojmë vendvotimet në Çair dhe në Tetovë apo do të ketë edhe ndonjë masë edhe më radikale, këtë do ta shqyrtojmë brenda koalicionit.”, theksoi deputetja e Alternativës, Safije Sadiku Shahini.
Më 28 janar 2024, Kuvendi i Maqedonisë do të votojë për formimin e Qeverisë teknike me kryeministër një shqiptar, Talat Xhaferin, shkruan Demokracia.com.
Që kjo do të ndodhte ishte paralajmëruar gati katër vite më herët nga ish-drejtuesi i Ushtrisë Çlirimtare Kombëtare, Ali Ahmeti, në cilësinë e kryetarit të Bashkimit Demokratik për Integrim, më 22 qershor 2020.
Pavarësisht këtij momenti historik nëpër të cilin po kalojnë shqiptarët me rol shtetformues në Republikën e Maqedonisë së Veriut, kryeministri i Kosovës, Albin Kurti, i cili gjatë opozitarizmit të tij kapej rreth ideve për avancimin e çështjes kombëtare shqiptare në rajon, as kësaj radhe nuk është pozicionuar në mbështetje të realizimit të kësaj arritjeje historike.
Më 24 dhjetor 2024, Lëvizja Vetëvendosje ka dalë në mbështetje publike të tri partive opozitare shqiptare. Në një takim të tyre, këshilltari i Albin Kurtit për Maqedoninë e Veriut, Bekim Qoku, kishte deklaruar se Lëvizja Vetëvendosje do të jetë shtylla e katërt e opozitës shqiptare në Maqedoninë e Veriut. Më tej, ai kishte thënë se do të kontribuojnë për ndryshim politik në Maqedoninë e Veriut, bashkë me Lëvizjes Demokratike, Alternativën dhe Lëvizjen Besa.
“Unë sot jam këtu për të inicuar bashkëpunimin tonë si Lëvizja Vetëvendosje, një lloj shtylle e katërt e këtij koalicioni tashmë të etabluar këtu, për të sjellë ndryshimin e munguar tash e 20 vjet që realizohet përmes të këtij regjimi që është në RMV. Vetëvendosja natyrisht që nuk mund të rrijë duarkryq”, theksoi Qoku. /Demokracia.com/
