Hoteli ndezi kritika midis aktivistëve për të drejtat e kafshëve pasi u publikuan imazhe dhe video të arinjve polarë që shikoheshin nga mysafirët në ambiente të mbyllura.

Një hotel në Kinë që po emëron veten si hoteli i parë në botë i arinjëve polar hapi dyert në fillim të muajit mars duke pasur shumë vizita pavarësisht kritikave nga aktivistët për mbrojtjen e kafshëve, përcjell Demokracia.com.

Atraksioni i cili është pjesë e parkut Harbin Polarland në provincën kineze Heilongjiang është i hapur 24 orë dhe ka 21 dhoma ku vizitorët mund të shikojnë arinjtë polar.

Fotografitë dhe videot e shpërndara në Twitter nga televizioni shtetëror kinez tregojnë arinjtë polarë në një ambient të mbyllur me xhama, ku ka akull artificial dhe pishina të vogla uji.

Imazhet ndezën një reagim të ashpër nga aktivistët e kafshëve në të gjithë botën, të cilët kritikuan hotelin për mbajtjen e arinjve në hapësira të mbyllura.

“Arinjtë polarë e kanë vendin në Arktik, dhe jo në kopshte zoologjike apo kuti qelqi në akuariume – dhe sigurisht jo në hotele,” tha për Reuters, Jason Baker, nënkryetar i lartë i grupit për të drejtat e kafshëve PETA.

Ai tha se për shkak të mungesës së ligjit për mbrojtjen e kafshëve në Kinë, kafshët shfrytëzohen nga bizneset për përfitime të veta.

Por, përkundër reagimeve të ashpra, Harbin Polarland ka këmbëngulur se vendi është i sigurt dhe I pranueshëm për arinjtë. /Demokracia.com/