300 të burgosur nga burgjet e Danimarkës do të vuajnë dënimin në burgjet e Kosovës.

Për transferimin e tyre në qelitë e Qendrës Korrektuese në Gjilan, në tre muajt e parë të vitit 2023, Qeveria e Kosovës dhe ajo e Danimarkës të hënën kanë nënshkruar dy letërkëmbime. Sipas kësaj marrëveshjeje, Qendra e Paraburgimit në Gjilan për 10 vite do të jepet me qira për shtetin e Danimarkës.

Në letër-qëllimin e përbashkët, që u nënshkrua nga Ministrja e Drejtësisë, Albulena Haxhiu, si dhe Ministri i Drejtësisë së Danimarkës, Nick Haekkerup, të cilën e ka siguruar Demokracia.com, thuhet se Qeveria e Kosovës do t’i ofrojë Mbretërisë së Danimarkës, kapacitetet e burgut, gjegjësisht institucionit korrektues që gjendet në Gjilan për 300 të burgosur, për qëllimin e ekzekutimit të dënimeve daneze dhe do të bëjë rregullimet e nevojshme për çdo lehtësi për të siguruar që ai është në përputhje me ligjet dhe standardet daneze.

“Qeveria e Danimarkës synon të paguajë një tarifë vjetore për përdorimin e një burgu prej 15,000,000 euro në varësi të numrit të të burgosurve për të cilin objekti është bërë i përshtatshëm në përputhje me rregullat dhe rregulloret daneze, me një tarifë të reduktuar për 12 muajt e parë të vitit përdorimi i burgut si periudhë tranzicioni. Qeveria e Danimarkës synon gjithashtu të paguajë një tarifë fillestare prej 5,000,000 euro për të mbuluar periudhën e tranzicionit, derisa burgu të jetë përfunduar dhe plotësuar me personel. Këto tarifa do të mbulojnë të gjitha kostot që lidhen me një marrëveshje të tillë”, thuhet në letër-qëllimin e nënshkruar mes dy shteteve.

Tutje aty thuhet se Mbretëria e Danimarkës do të jetë përgjegjëse për ekzekutimin e dënimeve daneze dhe do të sigurojë menaxhimin e nevojshëm për të siguruar që dënimet të ekzekutohen në përputhje me ligjet dhe detyrimet ndërkombëtare të Mbretërisë së Danimarkës.

“Qeveritë do të marrin masat e nevojshme për të siguruar që ekzekutimi i dënimeve të kryhet në përputhje me detyrimet ndërkombëtare të Mbretërisë së Danimarkës”, thuhet tutje në letërqëllim.

Po ashtu, sipas saj, përdorimi i kapacitetit të burgjeve në Republikën e Kosovës nga Mbretëria e Danimarkës duhet të specifikohet më tej në një traktat ndërmjet dy qeverive.

Gjithashtu, qeveritë do të shqyrtojnë mundësitë e bashkëpunimit më të gjerë ndërmjet Shërbimit Korrektues të Kosovës dhe Shërbimeve Daneze të Burgjeve dhe Sprovës, raporton Demokracia.com.

Qeveria e Kosovës dhe Qeveria e Danimarkës përmes kësaj marrëveshjeje synojnë të forcojnë edhe më tej bashkëpunimin dhe marrëdhëniet e kahershme ndërmjet dy vendeve. Në marrëveshje thuhet tutje se kjo po bëhet pasi që Shërbimi Danez i Burgjeve dhe Provës është shumë i mbingarkuar.