Trajneri Julian Nagelsmann ishte cilësuar si një trajner i dështuar te Bayern Munich dhe tashmë te kombëtarja e Gjermanisë cilësohet si personi i duhur për ta rikthyer skuadrën.

36-vjeçari ka zbuluar detaje gjatë konsferencës për shtyp.

“Prej moshës 14-vjeçare nuk i jam ndarë futbollit në role të ndryshme. Por pas largimit nga Mynihu nuk ishte e lehtë. Edhe pse në thelb pushimet karakterizojnë periudhën e relaksimit dhe prezencën pranë personave që do, por rezultoi e kundërta. Shpeshherë mendoja thellë tërheqjen përfundimtare nga futbolli, pavarësisht rolit.

Ndihesh i përhumbur. Kurrë deri në këtë moshë nuk e kisha ndierë veten kaq keq. Ama pasioni në lidhje me futbollin mbeti dhe ja ku jemi. Stoli i kombëtares në një moment të tillë nuk është i lehtë, ndonëse jam i përgjegjshëm për sfidat.

Mezi po pres të debutoj në pankinën e Gjermanisë. Do të jetë tejet emocionuese që të jem timonier i përfaqësueses në kampionatin europian, i cili do të zhvillohet në shtëpinë tonë. Jemi ambiciozë dhe me objektiva madhore, koha e duhur për t’i përveshur mëngët”, përfundoi Nagelsman.

Kujtojmë se ish-trajneri i Bajernit në periudhën qershor 2021-mars 2023 ka firmosur kontratë me Gjermaninë deri në përfundimin e “Euro 2024”.