Deputetja e Partisë Demokratike të Kosovës (PDK), Ganimete Musliu, gjatë seancës së sotme të Kuvendit të Kosovës ia ka kujtuar kryeministrit Albin Kurti, deklarëtn që ia kishte kushtuar ish-kryenegociatores në dialogun teknik Kosovë-Serbi, Edita Tahirit, asokohe zëvendëskryeministre, raporton Demokracia.com.

Musliu i ka ndërruar vetëm emrin Kurtit, pa e ndryshuar fare deklaratën e tij, duke e “goditur” me fjalët e veta.

“Përshtypje personale sa i përket Albin Kurtit dhe dialogut. Unë e kam vërejtje një shpërputhje midis dijes dhe mençurisë së Albin Kurtit dhe bindjes së tij për mençurinë dhe dijen e tij. Dhe nuk po them që është i paditur, nuk po them që është i pa mençur, por mendimi që ka ky për vetën, për dijen e tij, për mençurinë e tij, besoni është në shpërputhje me atë që ka”, ka thënë Musliu, përcjell Demokracia.com.

Deputetja e PDK-së ka ironizuar me fjalët e tij duke thënë se vetëbesimi i Kurtit është duke i shkaktuar dëme edhe qytetarëve të vendit.

“A e dini cili është problemi këtu se kjo është shumë serioze. Problem këtu është se pikërisht kjo shpërputhje midis asaj që njeriu mendon për vete dhe asaj që është, e prodhon një vetëbesim artificial që ia sheh krejt populli sherrin kur ky njeri është kryeministër”, ka thënë tutje Musliu.

Ajo ka bërë edhe disa konkluzione për shefin e ekzekutivit.

“Atëherë krejt ky vetëbesim megaloman, ky fodullëk na i bjen këto konkluza se: unë po di, unë jam i mençur e kështu me radhë. Ky vetëvlerësim i madh, ky inflacion i sedrës na i bjen këto konkluzione”./Demokracia.com/