Ministria e Punëve të Jashtme dhe Diasporës ka reaguar pas aksidentit në Austri ku u përfshi një autobus që po barte udhëtarë kosovarë.

MPJD përmes një komunikate për media, ka thënë se ambasadori Lulzim Pllana ka shkuar në vendin e ngjarjes, përcjell Demokracia.com.

“Deri në këtë fazë mund të konfirmojmë se nuk ka asnjë viktimë, dhe shtatë nga tetë personat që kanë pësuar lëndime, janë trajtuar dhe janë në gjendje të mirë shëndetësore”, thuhet tutje në këtë njoftim.

Komunikata e plotë:

NJOFTIM

Ministria e Punëve të Jashtme dhe Diasporës, përmes ambasadës së

Republikës së Kosovës në Vjenë, është informuar mëngjesin e sotëm për një aksident trafiku të autobusit që po barte udhëtarë kosovarë drejt shtetit të Austrisë.

Ambasadori i Kosovës në Austri, z.Lulzim Pllana, ka shkuar menjëherë në vendin e ngjarjes dhe është duke ofruar mbështetjen e ambasadës tonë për të gjithë të lënduarit dhe familjet e tyre.

Në Spitalin e Salzburgut, ndihmë mjekësore kanë kërkuar tetë persona, dhe pas trajtimit, shtatë prej tyre janë liruar, derisa një person vazhdon të mbahet për trajtim në këtë spital.

Ambasada e Kosovës në Austri është në kontakt të vazhdueshëm me autoritetet policore dhe shëndetësore në Salzburg, dhe do të dalë me një njoftim më të detajuar sapo të pranoj informatat zyrtare.

Deri në këtë fazë mund të konfirmojmë se nuk ka asnjë viktimë, dhe shtatë nga tetë personat që kanë pësuar lëndime, janë trajtuar dhe janë në gjendje të mirë shëndetësore.

MPJD do t’ju mbajë të përditësuar në vazhdimësi për rastin./Demokracia.com/