Rusia po intensifikon sulmet e saj në Frontin Lindor për të “maksimizuar rraskapitjen e trupave ukrainase”, përpara mbërritjes së ndihmës ushtarake perëndimore, veçanërisht avionëve luftarakë F-16.
Kështu ka thënë komandanti i forcave të armatosura të Ukrainës, Oleksandr Syrsky.
Forcat ruse kanë fituar terren në rajonet kufitare të Donetsk dhe Kharkiv muajt e fundit, falë mungesës së njerëzve dhe municioneve në Ukrainë.
“Komanda e trupave ruse aktualisht po bën gjithçka që është e mundur për të rritur dhe zgjeruar intensitetin e armiqësive në mënyrë që të maksimizojë rraskapitjen e trupave tona”, ka thënë Syrsky.
Sipas tij, Moska është e vetëdijshme se “koha do të luajë një rol” në favor të Kievit, me marrjen e “një sasie të konsiderueshme armësh dhe pajisjesh” nga aleatët e saj, përfshirë avionët F-16, të cilët duhet të forcojnë mbrojtjen ajrore ukrainase.
Komandanti ukrainas saktëson se forcat ruse po përqendrojnë përpjekjet e tyre rreth “Koupiansk, Pokorvsk, Kurakhové dhe Vremivka”, të vendosura në frontin lindor, ndërsa “luftimet e ashpra” vazhdojnë në lindje dhe jug.
