Disa pamje të publikuara thuhet se tregojnë momentin kur një nga luftanijet më moderne të Vladimir Putinit u ‘godit dhe u fundos’ nga një sulm shkatërrues ukrainas me dron gjatë natës.

Sipas mediave të huaja, përcjell Telegrafi, Sergey Kotov në vlerë prej 65 milionë dollarësh, i cili hyri në shërbim vetëm në vitin 2022, thuhet se u godit nga një sulm shpërthyes me dronë kamikazë pranë Feodosia, në Krimenë e pushtuar.

Pamjet synojnë të tregojnë momentin e shpërthimit të madh në errësirë afër bregut.

Anija zakonisht ka një ekuipazh prej 80 vetësh – dhe fati i atyre në bord mbetet i paqartë.

Andriy Yermak, shefi i shtabit të presidentit Volodymyr Zelensky, tha në Telegram të martën se “Flota ruse e Detit të Zi është një simbol i okupimit. Nuk mund të jetë në Krimenë e Ukrainës”, në një referencë të dukshme ndaj sulmit.

Ajo erdhi pasi Ura e Krimesë – lidhja kryesore lidhëse midis Rusisë dhe territorit të aneksuar – gjithashtu u gjend nën sulme të vazhdueshme, duke shkaktuar të paktën nëntë orë ndërprerje të trafikut.