Ministri ukrainas i Mbrojtjes, Oleksii Reznikov pasi kryesoi dje delegacionin e Ukrainës në bisedimet me Rusinë është kthyer menjëherë në vendin e tij, duke u ribashkuar me të tjerët në mbrojtjen e vendit.
Ai po i motivon ushtarët e tij edhe pas 128 orësh luftime në mbrojtje të vendit. “Shumë nga ata që prisnin ta pushtonin Kievin për 2-3 ditë tashmë janë në ferr. Le t’i mbajmë armët fort! Vazhdojmë rezistencën! Lavdi Ukrainës!”, ka shkruar ai në një postim në Facebook, ku i ka publikuar disa fotografi.
As dje, kur atij i është dashur t’i lë bashkëluftëtarët për pak dhe të dalë përballë të dërguarve të Putinit për të biseduar, nuk u duk më diplomat. Në një video të publikuar, ministri ukrainas u duk plot vetëbesim.
Para dy ditësh, Reznikov e publikoi një fotografi me presidentin e Ukrainës, Volodymyr Zelensky, në të cilën të dy u dukën të buzëqeshur e në disponim të mirë.
Fotoja u shkrep dhe u publikua pas 85 orësh luftime, ndërsa ministri ukrainas kishte shkruar disa rreshta emocionues mbi fotografinë.
“Pasnesër, vjen pranvera. Ukraina do të fitojë. Ajo tashmë po fiton! Armiku që erdhi në tokën tonë do të shkojë në drejtim të njohur”, kishte shkruar ai ndër tjerash.