Ministri i Jashtëm suedez Tobias Billström tha të martën se vendi i tij nuk dëshiron  armë bërthamore të NATO-s në tokën e tij, si dhe baza të përhershme ushtarake të aleancës.

“Sigurisht që trupat e NATO-s do të operojnë në Suedi. Megjithatë, ne nuk duam të kemi baza të përhershme të NATO-s.

Ne gjithashtu nuk shohim asnjë arsye për të pasur armë bërthamore në tokën tonë në kohë paqeje. Në këtë çështje, ne do të ndjekim rrugën e Norvegjisë dhe Danimarkës. Vetëm tre vende të NATO-s, SHBA, Anglia dhe Franca kanë armë bërthamore”, tha ai në një intervistë.

Billstrom kujtoi se “armët bërthamore nuk janë vendosur në territorin e asnjë prej vendeve të tjera anëtare të aleancës që nga fundi i Luftës së Ftohtë”. Kreu i ministrisë së jashtme suedeze shtoi se asnjë anëtar i NATO-s “nuk është i detyruar të ketë armë bërthamore në tokën e tij kundër vullnetit të tij”.

“Kështu që unë mendoj se kjo pyetje në lidhje me zhvillimin e armëve bërthamore në Suedi është pak e tepruar. Ne kemi hyrë në NATO pa asnjë kusht për këtë çështje”, nënvizoi ai.

Para dy javësh parlamenti hungarez ratifikoi marrëveshjen për anëtarësimin e Suedisë në NATO. Hungaria ishte vendi i fundit i NATO-s pas Turqisë që ratifikoi protokollin për pranimin e Suedisë në aleancë.

Të enjten e kaluar, më 7 mars, hyri zyrtarisht në fuqi protokolli për anëtarësimin e Suedisë në NATO dhe vendi skandinav u bë anëtari i 32-të i aleancës.