Miliona njerëz mund të vdesin nga uria nëse Rusia nuk heq bllokadën e porteve ukrainase në Detin e Zi, tha ministri i Jashtëm italian, Luigi Di Maio, transmeton Demokracia.com.

“Javët e ardhshme do të jenë vendimtare për zgjidhjen e krizës globale të ushqimit”, tha Di Maio pas një takimi virtual që përfshin vendet mesdhetare, si dhe presidentin e G7, Gjermaninë dhe Organizatën e OKB-së për Ushqimin dhe Bujqësinë.

“Dua ta bëj të qartë se ne presim sinjale të qarta dhe konkrete nga Rusia, sepse bllokimi i eksporteve të grurit do të thotë të mbash pengje dhe të dënosh me vdekje miliona fëmijë, gra dhe burra”, tha Di Maio.

Ministri i Jashtëm libanez Abdallah Bou Habib u tha ministrave se rritja e çmimeve të karburanteve dhe ushqimeve bazë po përkeqëson krizën në vendin e tij.

Ai bëri thirrje që lufta në Ukrainë “të ndalet me çdo kusht”, duke shtuar se nëse kjo nuk është e mundur, atëherë duhet të ushtrohet presion për të mundësuar eksportin e sigurt të drithërave dhe produkteve të tjera pa asnjë vonesë. /Demokracia.com/