Ambasadori i ri i SHBA-së në Serbi, Christopher Hill, nesër do t’i dorëzojë letrat kredenciale presidentit serb, Aleksandar Vuçiq, përcjellë Demokracia.com.

Siç njoftoi shërbimi për shtyp i presidentit serb, Vuçiq do t’i pranojë letrat kredenciale nga dy ambasadorët e sapoemëruar, nesër në Pallatin e Serbisë.

Vuçiq fillimisht do të pranojë letrat kredenciale të ambasadorit të Brazilit, Jose Mauro da Fonseca Costa Kouto, e më pas të ambasadorit të SHBA-së, Christopher Hill.

Më 15 tetor, presidenti i SHBA-së, Joseph Biden, emëroi Hillin si ambasador të ri në Serbi. Hill bëri betimin dy javë më parë dhe filloi përgatitjet për të ardhur në Beograd.

Hill zëvendëson Anthony Godfrey si ambasador në Serbi.

Ambasadori i ri i SHBA-së ishte i dërguari special i SHBA-së për Kosovën dhe luajti një rol kyç në negociatat që çuan në konferencën e Rambujesë të vitit 1999 dhe çlirimin e Kosovës. Hill llogaritet mik i madh i Kosovës.

Krahas Beogradit, Hill ishte në detyrë edhe në Shkup dhe Tiranë. Ai shërbeu si ambasador në Korenë e Jugut, Irak dhe Poloni. /Demokracia.com/