Hyrjet, daljet, madje lëvizja në shtetin e Kosovës me targat ilegale që lëshohen nga Serbia do të jenë të mundura vetëm deri më 1 dhjetor të këtij viti.

Qeveria e Kosovës i ka dhënë kohë shtesë komunitetit serb që posedojnë këto targa t’i zëvendësojnë ato nga 1 nëntori deri më 1 dhjetor.

Kjo pasi interesimi për të bërë këtë veprim sipas institucioneve ka qenë shumë i madh.

E Ministria e Punëve të Brendshme i ka treguar RTV Dukagjinit që deri më tani mbi 800 qytetarë serbë kanë larguar targat ilegale për t’i zëvendësuar me ato të ligjshmet.

Interesimin e serbëve për të konvertuar targat në RKS fillimisht e kishte vërejtur Policia e Kosovës.

Pas këtij vendimi të Qeverisë u raportua që Lista serbe kishte bërë thirrje për protesta, por që sipas analistit serb Branisllav Kërstiq kjo parti politike më nuk e ka kredibilitetin t’i përfaqësojë serbët.

Të gjithë pronarët e veturave me akronimet PR, KM, PZ, GL, UR, PE, DA apo GA për konvertimin e tyre në ato RKS, sipas vendimit të Qeverisë do të kenë edhe përfitime financiare gjatë procesit të konvertimit.