Në Marok, ekipet e emergjencave po pëpiqen të shpëtojnë njerëzit e mbetur poshtë rrënojave të tërmetit më shkatërrues në më shumë se një shekull. Ushtria dhe punonjësit e ndihmave po shpërndajnë ushqime dhe ujë në zonat e thella malore të rrënuara nga tërmeti i së premtes.

Rrugët e Marakeshit janë të mbushura me banorët që kanë humbur shtëpitë, të cilët po flenë përjashta dhe në tenda të improvizuara. Zonat malore të Atlasit janë ndër më të goditurat nga termeti 6.8 ballë. Një pasgoditje tjetër me magnitudë 3.9 shkundi vendin të dielën.

Autoritetet njoftuan se numri i të vdekurve ka shkuar mbi 2 mijë dhe pritet që kjo shifër të rritet. Vende të ndryshme të botës kanë ofruar të ndihmojnë vendin e goditur nga termeti, ndërsa pritet miratimi nga Maroku. Kombet e Bashkuara thonë se janë gati me ekipe shpëtimi dhe ndihma të tjera. Banorët vendas dhe turistët po dhurojnë gjak për të lënduarit. Ndërkaq, të mbijetuarit po tregojnë për tmerrin që përjetuan.

Darka e së premtës më 8 shtator për Yassin Noumgharin mbeti pothuajse e paprekur, ndërsa jeta e tij dhe e familjes së tij u kthye përmbys. Brenda pak sekondash tryeza e darkës u varros poshtë rrënojave të shtëpisë së tyre tashmë të kthyer në gërmadhë.

“Ky është vendi ku ishim ulur për darkë dhe gjithçka ndodhi brenda pesë sekondash”, tregon zoti Noumghar.

Banorë të tjerë thonë se ka ende njerëz që kanë mbetur nën gërmadha.

“Ka ende njerëz të varrosur këtu në këtë shtëpi, ata nuk morën ndihmën që u duhej dhe vdiqën. Unë i shpëtova fëmijët e mi dhe po përpiqem të gjej batanije dhe ndonjë gjë për të veshur për ta”, thotë Husein Adnaie, një i mbijetuar tjetër.

Fshati Moulay Brahim është një nga më të shkatërruarit nga tërmeti që u mori jetën mbi 2 mijë njerëzve, ndërsa operacionet e ekipeve të shpëtimit vazhdojnë të kërkojnë për të mbijetuar të tjerë.

Ministria e Brendshme njoftoi mëngjesin e së dielës për mbi 2 mijë të vdekur dhe mbi 2 mijë të plagosur, duke thënë se mbi 1400 ndodhen në gjendje kritike. Organizata Botërore e Shëndetësisë tha se më shumë se 300,000 njerëz janë prekur nga fatkeqësia.

Epiqendra e tërmetit ishte rreth 72 km në jugperëndim të Marakeshit, një qytet që njihet për xhamitë dhe ndërtesat mesjetare dhe tërheq shumë turistë.

“Ne po qëndronim në Marakesh dhe në hotelin tonë të gjithë njerëzit flinin jashtë pranë pishinës sepse kishin frikë nga pasgoditjet e tërmetit”, tregon zonja Kirsten Dixon, e cila po qëndronte në Marrakesh për një çështje biznesi.

Një kamera sigurie ka regjistruar momentin e tërmetit në Marakesh ku shihet një burrë që vrapon ndërsa pjesë të një ndërtese fillojnë të bien në rrugë.

Të dielën Papa Françesku ofroi lutje dhe solidaritet për viktimat e tërmetit më vdekjeprurës të Marokut në më shumë se gjashtë dekada.

“Dua të shpreh afërsinë time me njerëzit e dashur të Marokut, të goditur nga një tërmet shkatërrues. Lutem për të lënduarit, për ata që kanë humbur jetën dhe për të afërmit e tyre. Falenderoj shpëtimtarët dhe të gjithë ata që po punojnë për të lehtësuar vuajtjet e njerëzve. Ne qëndrojmë me popullin e Marokut”, tha Papa Françesku.

Maroku ka shpallur tre ditë zie dhe Mbreti Mohammed VI bëri thirrje që të dielën të mbahen lutje për të vdekurit në xhamitë e të gjithë vendit.