Kur Real Madrid i tha lamtumirë Marcelo-s në fund të sezonit të kaluar, goditja për Casa Blanca ishte mjaft e rëndë. Në fund të fundit, flasim “vetëm” për futbollistin më të suksesshëm në historinë e klubit, i cili ka tejkaluar edhe legjendat si Paco Gento apo Don Alfredo Di Stefano.

Braziliani u largua pas një sezoni të kaluar në hije, si për shkak të dëmtimeve ashtu edhe për shkak të moshës. Por në fund, në vend që të fluturonte për në MLS ose në Gjirin Persik ose një rikthim romantik në Brazil, mbrojtësi i krahut të majtë vendosi se do të qëndronte në Europë. Olympiakos e mori me kosto zero, por tani po pendohet shumë…

Mbipeshë dhe pothuajse asnjëherë i pranishëm – Siç raporton AS, gazetari grek Kostas Nikolakopulos shpjegon se klubi do të ishte i gatshëm ta dërgonte Marcelo-n diku tjetër që në janar. Në fund të fundit, numrat janë të pamëshirshëm ndaj brazilianit.

Për të vetëm dy ndeshje në kampionat me fanellën bardhekuqe, të dyja si zëvendësues, për gjithsej 40 minuta. Dhe nuk shkoi më mirë në Europa League, duke qenë se janë tre paraqitje, gjithmonë të gjitha nga stoli dhe koha e lojës mezi arrin 60 minutat.

Për pjesën tjetër, një stol dhe një varg lëniesh jashtë nga ekipi (përfshirë ato në derbin kundër Panathinaikos dhe AEK-ut), të cilat sipas gazetarit janë të motivuara nga forma e keqe fizike e lojtarit brazilian: Marcelo është dukshëm mbipeshë, aq më tepër arsyeja që Olympiakos të përpiqet t’i gjejë atij një destinacion të ri në kohën më të shkurtër të mundshme.

Ai dhe Vrsalijko janë më të pasurit e klubit – Gjithashtu sepse paga e Marcelo-s nuk është shumë e lehtë. Në të vërtetë, së bashku me atë të një tjetër ish-banori të Madridit si Sime Vrsalijko, ai ka rrogën më të lartë të skuadrës. Ndaj, është logjike që klubi synon t’i japë fund marrëdhënieve, si me brazilianin, ashtu edhe me kroatin, i cili ka luajtur shumë pak (9 paraqitje, 665 minuta) që kur ka shkuar në Greqi.

Por çështja është një: kush i merr dy lojtarët? Nuk duket se ka ndonjë interesim të madh për Vrsalijkon. Më mirë për Marcelo-n, i cili ka një reputacion ndërkombëtar dhe një rekord që sigurisht ndihmon.

Për ish-yllin e Real-it, në fakt, duket se interesohet Besiktas por edhe Los Angeles FC, kampion i freskët i MLS-së, ku ish-shoku i skuadrës Bale ka shkuar tashmë… për të kaluar dimrin. Si do të përfundojë kjo…tragjedi greke? Do ta shohim në janar…