Malajzia ka dëbuar 1 mijë e 86 persona përsëri në Mianmar, duke kundërshtuar një urdhër të gjykatës dhe thirrje nga grupi i të drejtave të njeriut për të ndaluar procesin.
Organizatat e të drejtave thonë se grupi përfshin disa pakica etnike të cilat kanë vuajtur përndjekje në Mianmar.
Ata thonë se dërgimi i tyre përsëri në Mianmar, i cili është në mes të një puçi, mund t’i vërë ata në rrezik edhe më të madh.
Por Malajzia ka thënë se ata që po dërgohen kanë kryer vepra penale të imigracionit dhe nuk janë azilkërkues.
“Të gjithë ata që u kthyen kishin rënë dakord të ktheheshin vullnetarisht pa u detyruar nga asnjë palë,” tha në një deklaratë Khairul Dzaimee Daud, drejtori i përgjithshëm i emigracionit i Malajzisë.
Daud shtoi se ata që u riatdhesuan nuk përfshinin refugjatë Rohingya ose azilkërkues, duke bërë jehonë në një deklaratë të mëparshme nga Malajzia se nuk do të dëbonte ata të regjistruar në Komisionerin e Lartë të KB për Refugjatët (UNHCR).
Sidoqoftë, autoritetet kanë bllokuar UNHCR për të hyrë në qendrat e paraburgimit të imigracionit në Malajzi për më shumë se një vit, sipas raporteve – që do të thotë që KB nuk është në gjendje të konfirmojë deklaratën e Daud.
“Para se të dërgojë dikë përsëri në një situatë ku ata mund të përballen me persekutim, qeveria e Malajzisë duhet të … sigurojë që UNHCR të ketë qasje në qendrat e paraburgimit … kështu që bashkësia ndërkombëtare mund të sigurohet se nuk po i dërgon njerëzit në rrezik”, tha grupi i të drejtave të Njeriut Human Rights Watch (HRW).
UNHCR gjithashtu shtoi se të paktën gjashtë persona të regjistruar në organizatë ishin midis të dëbuarve, sipas një raporti të agjencisë së lajmeve Reuters. Grupet e të drejtave thonë gjithashtu se azilkërkuesit nga pakicat Chin dhe Kachin, të cilët po largohen nga persekutimi, janë midis atyre që dëbohen.
Phil Robertson, zëvendës drejtor i Azisë për HRW, i tha BBC se Malajzia “i kishte dërguar përsëri në duart e një junte ushtarake të njohur për përndjekjen e atyre që largohen nga vendi për arsye politike”.
Z. Robertson gjithashtu i bëri thirrje departamentit të imigracionit të “përfundojë bllokadën e tij të UNHCR”.
