Nëse pyet veten se cila është macja më e rrezikshme në planet, zakonisht të vijnë në mendje luanët, leopardët ose tigrat

Titulli i maces më vdekjeprurëse në botë në fakt mbahet nga një banore krejtësisht e panjohur dhe në dukje e padëmshme i savanave afrikane – macja këmbëzezë (Felis nigripes).

Kjo mace e egër më e vogël në Afrikë jeton në kullotat e thata të pjesës jugore të kontinentit dhe rrallë rritet më shumë se 20 centimetra në lartësi.

Me një peshë prej vetëm dy deri në gjashtë kilogramë, macja këmbëzezë duket më shumë si një kafshë shtëpiake e përkëdhelur sesa një grabitqare. Megjithatë, sipas serialit dokumentar Super Cats, ajo vret më shumë pré brenda një nate sesa një leopard në gjysmë viti, shkruan Live Science, përcjell Telegrafi.

E vogël por vdekjeprurëse

Seriali i transmetuar në PBS, sjell vështrimin e parë të detajuar mbi këtë specie interesante, me ndihmën e studiuesit Aleksander Sliva nga Kopshti Zoologjik i Këlnit, i cili ka studiuar macen këmbëzezë që nga vitet “90 të shekullit të kaluar.

Xhirimet ishin jashtëzakonisht të vështira për shkak të madhësisë së kafshës dhe stilit të jetës së natës. Ekipi përdori kamera speciale të ndjeshme ndaj dritës për të dokumentuar sjelljen e saj të gjuetisë – e cila nuk ishte regjistruar kurrë më parë.

Dhe ajo që regjistruan kamerat ishte mbresëlënëse: kjo mace e vogël vret midis 10 dhe 14 zogj ose brejtës brenda një nate, me një mesatare prej një kapjeje çdo 50 minuta. Ka një shkallë suksesi të pabesueshme prej 60 për qind – tri herë më të lartë se luanët, sulmet e suksesshme të të cilëve rrallë kalojnë 20 deri në 25 për qind.

– Nëse je gazelë ose antilopë afrikane, një mace këmbëzezë nuk përbën kërcënim. Por nëse je mi ose zog, është një makth i vërtetë, thotë Luke Hunter, drejtor i organizatës për ruajtjen e maceve të egra Panthera.

Tri stile gjuetie

Macet këmbëzeza gjuajnë në tri mënyra të ndryshme: “gjueti e shpejtë” – kërcime të papritura nëpër bar me të cilat e befasojnë prenë e tyre; “gjueti në heshtje” – duke iu afruar ngadalë dhe në heshtje viktimës; dhe “gjueti në pritë” – duke pritur pa lëvizur për orë të tëra para vrimës derisa brejtësi të dalë. Pavarësisht taktikave, suksesi rrallë mungon.

Kjo specie gjendet vetëm në tre vende – Botsvana, Namibia dhe Afrika e Jugut – dhe për shkak të humbjes së habitatit dhe rënies së numrit të preve, ajo është listuar si e rrezikuar nga Bashkimi Ndërkombëtar për Ruajtjen e Natyrës (IUCN).

Grabitqar i vogël, probleme të mëdha

Edhe pse duken të brishta dhe të lezetshme, macet me këmbë të zeza janë një pjesë jashtëzakonisht e rëndësishme e ekosistemit. Zhdukja e tyre mund të shkaktojë reaksione zinxhir në natyrë. Humbja e habitateve natyrore për shkak të kullotjes së bagëtive kërcënon më tej mbijetesën e tyre, por ekspertët besojnë se nuk është ende tepër vonë.

– Jo gjithçka është kaq e zymtë. Ne kemi një shans për t’i ruajtur ato, por duhet të punojmë në mënyrë aktive për këtë – thotë Hunter.