Lojërat Mesdhetare ‘Prishtina 2030’ po dalin të jenë ‘mollë sherri’ ndërmjet Komunës së Prishtinës dhe Qeverisë së Kosovës.

Një kërkesë e kësaj të fundit për ndryshim të marrëveshjes me Komitetin Ndërkombëtar të Lojërave Mesdhetare ka sjellë përgjigjen e ashpër të nënkryetarit të Prishtinës Alban Zogaj.

Ai në një intervistë për KosovaPress thotë se Qeveria e Kosovës pati tendencë për ta përjashtuar Komunën e Prishtinës nga këto lojëra, derisa ka shfaqur brengën se për shkak të mospajtimeve, mund të ketë vonesa në ndërtimin e infrastrukturës së nevojshme sportive.

Ai ka shtuar se tendenca e qeverisë për ta përjashtuar Prishtinën nga ky organizim është krejtësisht i pakuptimtë.

Zogaj ka një mesazh të qartë për Qeverinë e Kosovës, duke thënë se Lojërat Mesdhetare “nuk organizohen pa Prishtinën”.

Si pasojë e këtyre mospajtimeve, nënkryetari i Prishtinës thekson se komunikimi dhe raportet me Qeverinë dhe Ministrinë e Sportit nuk janë në nivelin e duhur.

Megjithatë, optimizmi për ta tejkaluar këtë situatë ekziston ende dhe sipas Zogajt Kosova nuk rrezikon ta humbë të drejtën e organizimit të këtyre lojërave.

Ndryshe, Kosova e fitoi të drejtën e organizimit të Lojërave Mesdhetare në Asamblenë e Përgjithshme të Komitetit Ndërkombëtar të Lojërave Mesdhetare të mbajtur në shtator të vitit të kaluar në Kretë të Greqisë.