Jeff Hovenier, ambasador i Shteteve të Bashkuara të Amerikës, është deklauar sot për shumë çështje, nga ajo për rastin e pezullimit të certifikatës së biznesit të Klan Kosovës, shtensiomin në veri e kufijtë e shtetit të Kosovës. Si rrallë, z. Hovenier ishte i qartë në të gjitha frontet, duke bërë që të reagojë edhe Serbia në lidhje me deklaratën e ambasadorit amerikan për Listën Serbe. Çka tha ambasadori amerikan?

Le të nisim nga tema kryesore e ditëve të fundit, pra nga rastin i Klan Kosovës, televizionit që iu pezullua certifikata e biznesit nga ARBK-ja. Pas hidhërimit për veriun, ShBA-ja duket se është hidhëruar edhe për rastin e Klan Kosovës.

Para gazetarëve të Kosovës, Hovenier deklaroi se ShBA-ja, plus partnerët e amerikanëve, janë të shqetësuar për rastin e Klan Kosovës.

“Nuk besoj që është mister që Shtetet e Bashkuara dhe partnerët tanë janë të shqetësuar me situatën. Thellë të shqetësuar.” – u shpreh ambasadori amerikan.

Hovenier vlerësoi se ShBA-ja dhe partnerët e amerikanëve, nuk e shohin këtë temë vetëm si çështje biznesi, por edhe si çështje të lirisë së mediave.

“Nuk e shohim këtë çështje thjesht si çështje biznesi. E shohim si çështje të lirisë së mediave dhe po e adresojmë si të tillë.” – ishte fjalia tjetër e qartë e ambasadorit për rastin në fjalë.

E pasi e krue çështjen e Klan Kosovës, z. Hovenier foli edhe për veriun. Së pari, ai tha se situata duhet të shtensionohet, duke e përmendur edhe themelimin e Asociacionit të komunave me shumicë serbe.

“Për Qeverinë e Kosovës, ne po kërkojmë që ajo të ndërmarrë veprime që de-eskalojnë tensionet në veri dhe krijojnë një mjedis të ndryshëm në të cilin të dyja vendet mund të punojnë drejt zbatimit të plotë të zotimeve që kanë marrë në marrëveshjen e Ohrit. Për Kosovën kjo do të thotë të ecë përpara me njëfarë urgjence në procesin e negociatave dhe themelimit të një asociacioni të komunave me shumicë serbe, si pjesë e angazhimit të marrë nga Qeveria e Kosovës. Nuk është i vetmi detyrim që ka dhe kjo nuk është dispozita e vetme e marrëveshjes së Ohrit, por është e rëndësishme.” – tha ai.

E pasi e dërgoi mesazhin për Kosovën, Hovenier i kërkoi edhe Serbisë t’i zbatojë obligimet e saj.

“Por po ashtu ne shikojmë që edhe qeveria e Serbisë t’i zbatojë obligimet e saj, ajo ka hyrë në një sërë obligimesh dhe ato duhet të përmbushen. Dhe kjo është pjesë e asaj që diplomacia amerikane dhe diplomacia e kolegëve tanë të Bashkimit Evropian po përpiqet të arrijë.” – shtoi ambasadori amerikan.

Në mesazhet e tij, kryediplomati amerikan në Kosovë nuk e harroi as Listën Serbe e zgjedhje në veri, duke theksuar se ShBA-ja pret që serbët e Kosovës, përfshirë Listën Serbe, të marrin pjesë në zgjedhjet e reja.

“Jam i sigurt se liderët e Listës Serbe kanë dëgjuar, sepse kam pasur biseda me Escobarin, pritshmëritë e Shteteve të Bashkuara që serbët e Kosovës, përfshirë Listën Serbe, do të marrin pjesë në zgjedhjet e reja komunale kur të caktohen, kjo është pjesë e përgjegjësive të partive demokratike në demokraci, ju merrni pjesë në procesin demokratik gjë që është pritshmëria jonë, kjo është kërkesa jonë. – tha ai, transmeton RTV 21.

Tutje, Hovenier theksoi se Lista Serbe është një parti opozitare e Kosovës, shtet sovran e demokratik.

“Ne e konsiderojmë Kosovën shtet sovran, të pavarur dhe demokratik. Dhe kështu, puna që bëjmë me Listën Serbe, një parti që është parti politike e Kosovës, parti opozitare në Kosovë, është e ngjashme me punën që bëjmë me partitë e tjera opozitare në Kosovë, por nuk duhet të bëhet fjalë për pikëpamjen e Shteteve të Bashkuara, ne hedhim poshtë çdo sugjerim se Kosova është disi diçka tjetër përveç shtetit të pavarur, dhe kjo përfshin veriun e Kosovës. Siç e kam thënë shumë herë, ne e dimë saktësisht se ku është kufiri, është në veri të Mitrovicës, apo jo? Dhe kështu, ne kërkojmë që Lista Serbe të luajë rolin e saj si parti politike në një Kosovë sovrane, demokratike dhe të pavarur. Ne nuk e konsiderojmë atë si parti politike serbe, ne e konsiderojmë si një parti të serbëve etnikë në Kosovë, duhet ta bëj të qartë këtë pike.” – tha ai.

Në lidhje me këto deklaratat e fundit, kishte reagime edhe nga Serbia. Petar Pektkoviq, drejtori i të ashtuquajturës “Zyre për Kosovën” në Qeverinë e Serbisë, i reagoi ashpër ambasadori amerikan në Kosovë.

“Ne e dimë mirë ambasador ku janë kufijtë në Kosovë, ata janë kufijtë e Serbisë në përputhje me Kartën e OKB-së dhe Rezolutën 1244 të OKB-së. Dhe Lista Serbe është zgjedhja dhe zëri i popullit serb që mbron interesat kombëtare të popullit të vet në Kosovë, e jo të ambasadave të huaja.” – ka shkruar ai në X./nacionale/