Emisari i BE-së për dialogun Kosovë-Serbi, Miroslav Lajçak, ka takuar presidentin e Maqedonisë së Veriut, Stevo Pendarovski, një ditë përpara takimit të kryeministrit të Kosovës, Albin Kurtit dhe presidentit të Serbisë, Aleksandër Vuçiq në Ohër, ku pritet të arrihet dakordimi për aneks-zbatimin e marrëveshjes.

Lajçak, me anë të një postimi në ‘Twitter’ tha se e falënderoi Pendarovskin për mikpritjen e këtij takimi, si dhe diskutuan për dialogun Kosovë-Serbi dhe pritshmëritë e emisarit për të, shkruan Demokracia.com.

“Sot mbërrita në Maqedoninë Veriore. Përpara takimit të nesërm të nivelit të lartë të Dialogut, u takova me Presidentin, Stevo Pendarovski, për ta informuar atë për situatën në dialog dhe pritshmëritë ndaj tij. Iu shpreha falënderues për mikpritjen e Maqedonisë së Veriut”, ka deklaruar Lajçak.

Nesër në Ohër pritet të takohen Kurti dhe Vuçiq për ta negociuar aneksin për zbatimin e marrëveshjes evropiane.

Pala kosovare është shprehur e gatshme për ta nënshkruar marrëveshjen evropiane, mirëpo ajo serbe ka shfaqur ambiguitet sa i përket pranimit të saj.

Ndërkombëtarët në deklaratat e tyre në vazhdimësi kanë thënë se nuk ka hapësirë negociimi për pikat e arritura në marrëveshje, vetëm për aneksin e zbatimit. /Demokracia.com/

Arrived in 🇲🇰 today. Ahead of tomorrow’s High-level meeting of the Dialogue I met with President @SPendarovski to inform him about the state of play in the Dialogue and expectations. Grateful for North Macedonia’s hospitality. pic.twitter.com/xf6GgByttL

— Miroslav Lajčák (@MiroslavLajcak) March 17, 2023