Kina dhe Shtetet e Bashkuara do të fillojnë dialogun për tarifat të shtunën, në Zvicër.

Pas shumë deklaratave luftarake, gënjeshtrave politike dhe mbi të gjitha llogaritjeve mbi dëmin e ndërsjellë të luftës tregtare, Kina dhe Shtetet e Bashkuara kanë vendosur të fillojnë një dialog.

Sekretari i Thesarit të SHBA-ve, Scott Bessent, dhe Zëvendëskryeministri kinez përgjegjës për ekonominë, He Lifeng, do të takohen më 10 maj, në terren neutral në Gjenevë.

Negociatat “u organizuan me kërkesë të Shteteve të Bashkuara”, pretendon një zëdhënës i Ministrisë së Jashtme të Pekinit.

Por kinezët kishin sinjalizuar gatishmërinë e tyre prej ditësh, me kusht që amerikanët të kishin demonstruar “sinqeritet dhe jo shtrëngim dhe zhvatje”.

Ka pasur deklarata të rreme force nga të dyja palët: Donald Trump në fund të prillit kishte deklaruar se kishte marrë një telefonatë nga Xi Jinping, kinezët e kanë mohuar, duke e quajtur “lajm të rremë”.

Megjithatë, ata kishin reklamuar një rishikim në rënie të hakmarrjes së tyre tregtare ndaj tarifave amerikane prej 145%, duke hartuar një listë me mbi njëqind kategori produktesh të importuara nga SHBA-të që do të përjashtohen nga tarifat e tyre prej 125%.

Është e qartë se tarifat doganore kaq të larta nuk kanë asnjë kuptim ekonomik dhe vetëm sa mund t’i dëmtojnë të dy superfuqitë.

“Në Gjenevë këtë fundjavë nuk do të diskutojmë një marrëveshje të madhe tregtare, por për uljen e tensioneve, kjo na duhet përpara se të ecim përpara”, tha Bessent, i cili është shfaqur si më racional dhe dialogues nga burrat në Administratën Trump.

Ai e këshilloi presidentin të ngrijë për 90 ditë tarifat kundër dhjetëra vendeve të përfshira në listën famëkeqe të Ditës së Çlirimit (me përjashtim të Kinës, e cila duket të jetë objektivi përfundimtar i përplasjes) dhe tani po përgatitet të takohet me kundërshtarët e tij.

Në Gjenevë ai do të ketë në krah përfaqësuesin për tregtinë, Jamieson Greer.

He Lifeng, shtatëdhjetë vjeç, ka qenë i afërt me Xi Jinping që nga koha kur presidenti ishte ende një zyrtar provincial në Fujian.

Duhet të ketë edhe një miqësi midis të dyve, sepse në vitin 1986 ai ishte midis të ftuarve në dasmën e Xi me Peng Liyuan. I diplomuar në ekonomi, pas një sërë pozicionesh si sekretar partie në qytete të ndryshme në Fujian, zyrtari u dërgua në qytetin e madh portual të Tianjin ku fitoi nofkën “Shkatërruesi” për planin e tij masiv të rindërtimit urban dhe projektet e mëdha të infrastrukturës që ndryshuan fytyrën e zonës duke shembur ndërtesa dhe lagje të vjetra në emër të modernizimit (duke rritur borxhin publik lokal).

Ai bëri hapin e madh drejt Pekinit në vitin 2014 kur u emërua nga Xi si zëvendëssekretar i Partisë në Komisionin Kombëtar të Zhvillimit dhe Reformës, zemra e aparatit të planifikimit makroekonomik të sistemit komunist.

Në vitin 2017, ai u ngjit në krye të Komisionit dhe në vitin 2022 Kongresi Komunist e përfshiu atë midis 24 burrave të Byrosë Politike.

Që nga viti 2023, ai ka qenë zëvendëskryeministër përgjegjës për ekonominë dhe financat.

Politikanët dhe financierët perëndimorë që e kanë takuar në të kaluarën e kanë përshkruar He-në si një anëtar të ngurtë të nomenklaturës komuniste, një mandarin që as nuk thotë “Mirëmëngjes” në anglisht dhe fshihet pas deklaratave të parapërgatitura.

Një biznesmen amerikan i tha Reuters se diskutimi me Zëvendëskryeministrin He “është si t’i bësh një pyetje ChatGPT-së”.

Por gjatë vitit të kaluar, ka pasur një ndryshim: disa burime i thanë Reuters se zëvendëskryeministri ka evoluar, duke demonstruar se ai ka fuqi negociuese dhe dëshirë për të zgjidhur problemet në tryezë.

Në mars, gjatë bisedimeve me investitorë amerikanë dhe udhëheqës biznesi që kishin ardhur në Pekin për Forumin e Zhvillimit të Kinës, He Lifeng bëri përshtypje me qasjen e tij të re pragmatike.

Ai foli drejtpërdrejt për problemet ekonomike të Kinës, nga kriza e pasurive të paluajtshme deri te deflacioni, duke sugjeruar zgjidhje të sofistikuara.

Por sigurisht, negociatori kinez i përgjigjet drejtpërdrejt Xi-së dhe nuk pritet që ai të ketë autonomi në bisedimet me amerikanët në Gjenevë.

Sipas amerikanëve, He Lifeng ishte dhe mbetet “toger i Xi-së në ndërtimin e një suficiti tregtar prej trilion dollarësh”.

Marrë nga “Corriere della Sera”, përshtatur për “Albanian Post”.