“Që nesër mund ta shpallim koalicionin me VMRO-DPMNE-në”.
Ky është paralajmërimi i kryetarit të partisë “Lëvizja Besa”, Bilall Kasami, vetëm pak kohë pas shpalljes së rezultateve të para të Zgjedhjeve të 8 Majit për Kuvendin e Maqedonisë së Veriut, shkruan Demokracia.com.
Sipas këtyre rezultateve, koalicioni ku bënë pjesë edhe Kasami, “Lëvizja Evropiane për Ndryshim”, që përbëhet edhe nga “Lëvizja Demokratike” e Izet Mexhitit, “Alternativa” e Afrim Gashit dhe “Vetëvendosje” që përfaqësohet nga këshilltari i tij Bekim Qoku, nuk ka arritur të dalë forca e parë politike në kampin e shqiptarëve.
Përkundrazi, koalicioni i ndërtuar nga Bashkimi Demokratik për Integrim (BDI) i Ali Ahmetit nën emrin “Fronti Europian” ka arritur rezultatin historik në Zgjedhjet e 8 Majit 2024, duke u shndërruar fuqia e dytë politike në Kuvendin e Maqedonisë së Veriut.
Sipas rezultateve, “Fronti Europian” i BDI-së së Ali Ahmetit ka siguruar 19 mandate në Kuvendin e Maqedonisë së Veriut, duke lënë pas LSDM-në maqedonase me 18 deputetë, ndërkaq opozita shqiptare që u formua nga 4 subjekte politike ka arritur të fitojë vetëm 13 deputetë.
PARALAJMËRIMI I KASAMIT, SI PARALAJMËRIM PËR T’IA VJEDHUR BDI-së VENDIN NË QEVERINË E RE TË MAQEDONISË
Për herë të parë në Maqedoninë e Veriut mund të shkelet parimi demokratik i ndërtuar në këtë shtet, se fituesi nga kampi maqedonas bashkëqeverisë me fituesin në kampin shqiptar, por që nuk përjashtonte edhe partitë tjera t’i bashkoheshin këtij koalicioni.
Ky parim mund të marrë fund me miratimin e partive shqiptare opozitare, “Lëvizja Besa” e Bilall Kasamit, “Lëvizja Demokratike” e Izet Mexhitit dhe “Alternativa” e Afrim Gashit, të cilat brenda dy javësh pësuan debakël në dy procese zgjedhore, në zgjedhjet presidenciale (24 prill 2024) dhe në zgjedhjet parlamentare (8 maj 2024).
Paralajmërim të ngjashëm, VLEN kishte dhënë edhe më parë, gjatë fushatës zgjedhore, shkruan Demokracia.com. Deklarata e mbrëmjes së 8 majit dhe ajo e datës 26 prill 2024, përmes së cilave tregohet qartë se koalicioni opozitar VLEN do të bëhet pjesë e Qeverisë, e cila do të formohet nga VMRO-DPMNE, po shihet si grabitje e të drejtës që i takon partisë më të mbështetur nga votuesit shqiptar, që në këtë rast është BDI e Ali Ahmetit.
VLEN-i 2024 ndjek rrugën e VLAN-it 2014
Shkatërrimi i këtij parimi, se fituesi nga kampi maqedonas bashkëqeverisë me fituesin në kampin shqiptar, por që nuk përjashton që edhe partitë tjera t’i bashkoheshin këtij koalicioni, do të hedh themelet për fillimin e defaktorizimit të shqiptarëve në Maqedoninë e Veriut. Fatkeqësisht, në mbështetje të idesë që Bashkimi Demokratik për Integrim (BDI) i Ali Ahmetit të çohet në opozitë pavarësisht rezultatit, qëndron edhe kryeministri i Kosovës, Albin Kurti. VLEN-i që mbështetet nga Kurti e ka të gatshme idenë sesi mund t’i vidhet pushteti partisë që fiton zgjedhjet. Kjo ka ndodhur në vitin 2014 në Kosovë dhe në ballë të idesë qëndronte asokohe edhe opozitari Albin Kurti, i cili ishte bashkuar me LDK, AAK dhe Nisma, duke mos lejuar që partia fituese, Partia Demokratike e Kosovës (PDK), të ndërtonte institucionet.
Në zgjedhjet e vitit 2014, Partia Demokratike e Kosovës (PDK) së bashku me partitë e koalicionit mori 222.181 vota apo 31.38 %, Lidhja Demokratike e Kosovës (LDK), 184.596 vota apo 25.24 %, Lëvizja Vetëvendosje 99.397 vota apo 13.59%, Aleanca për Ardhmërinë e Kosovës (AAK) 69.793 vota apo 9.54%, Lista Serbe 38.199 vota apo 5.22% dhe Nisma për Kosovën 37.681 vota ose 5.15%. Menjëherë pas zgjedhjeve, Vetëvendosje, LDK, AAK dhe Nisma, që në skenën politike njiheshin si VLAN, ishin barrikaduar kundër PDK-së, duke deklaruar njëzëri se nuk bashkëqeverisin me PDK-në. Madje kishin formuar një koalicion me emrin “VLAN” (Vetëvendosje – LDK – AAK – Nisma) ku ishin shumicë dhe provonin të krijonin Qeverinë me Ramush Haradinajn kandidat për kryeministër.
Mirëpo, Gjykata Kushtetuese e Kosovës e kishte parë si jo-kushtetues aktin e partive jo-fituese të zgjedhjeve dhe ua kishte pamundësuar atyre marrjen e drejtimit të Qeverisë. Sipas kësaj gjykate, mandati për të krijuar Qeverinë i takon partisë fituese të zgjedhjeve, që në këtë rast ishte PDK.
Ngërçi politik i 2014 zgjati për 6 muaj, deri sa LDK kishte vendosur ta heqë “L”- në nga “VLAN”, duke e lënë vetëm si VAN. Megjithkëtë, që nga viti 2014, skena politike pësoi goditje të madhe, pasi në mënyrë të paprecedentë partitë humbëse të zgjedhjeve u orgaizuan për të pamundësuar realizimin e rezultatit zgjedhor apo vullnetit të qytetarëve të Kosovës. /Demokracia.com/