Kryeministri Albin Kurti ka marrë pjesë në një panel të diskutimit në kuadër të forumit “GLOBSEC” në Sllovaki. Të ftuar tjerë në panel janë Emisari i BE-së, Lajcak, presidenti malazez Gjukanoviq, kryeministri maqedonas Kovaqevski dhe Emisari britanik për Ballkanin Perëndimor, Stuart Peach.

Pavarësisht se Kosova po merr pjesë në bisedime me Serbinë dhe hiq më larg se dje vetë Kurti në një konferencë për media shprehu përkushtimin e qeverisë së tij për vazhdimin e dialogut, ai sot tha se fatkeqësisht Serbia thotë se nuk do ta njohë kurrë pavarësinë e Kosovës, shkruan Demokracia.com.

Kurti tha po ashtu se Serbia nuk i pranon krimet që i ka bërë në Kosovë.

“Në procesin e bisedimeve me Serbinë kam qenë i angazhuar dhe konstruktiv, neve na nevojitet një dialog parimor mes dy palëve të barabarta për një marrëveshje ligjërisht të obligueshme për normalizim të marrëdhënieve, që ka në qendër njohjen reciproke. Fatkeqësisht, Serbia thotë se nuk e njeh kurrë Kosovën dhe rrjedhimisht nuk i pranon krimet që i ka bërë në Kosovë. Për të qenë i sinqertë, e dyta na ofendon dhe na lëndon më shumë. 19 shtete demokratike të NATO-s u bashkuan për të ndalur gjenocidin e regjimit të Millosheviqit në Kosovë, ata kishin kundërshtime në shtetet e veta, por vepruan”, u shpreh Kurti, përcjell Demokracia.com.

Duke folur për iniciativën e Ballkanit të Hapur, Kurti tha se Kosova është e hapur ndaj Procesit të Berlinit.

“Megjithatë, ne po provojmë shumë në Bruksel që të arrijmë marrëveshje kur vjen puna te targat dhe energjinë elektrike në veri, si dhe të zhdukurit nga lufta e fundit. Kosova është storie suksesi i njerëzve liridashës të Kosovës. Ne jemi falënderues ndaj shteteve perëndimore. Ballkani Perëndimor është i hapur ndaj BE-së, NATO-s, SHBA-së, por ne nuk mendojmë se duhet të hapemi ndaj fuqive të lindjes, ne përkrahim Procesin e Berlinit, i cili po përkrahet sërish nga kancelari Olaf Scholz”, u shpreh ai. /Demokracia.com/