Kryetari i PDK-së, Memli Krasniqi ka kujtuar marshin me rreth 100 mijë qytetarë i cili u bë dy vjet më parë për ish-krerët e UÇK-së të cilët po mbahen në Hagë, Hashim Thaçin, Kadri Veselin, Jakup Krasniqin dhe Rexhep Selimin.Ai thotë në Facebook, se ajo ditë ishte e mbushur me krenari, dhembje dhe vendosmëri, sepse “kur padrejtësia bëhet ligj, qëndresa bëhet detyrë”.“Sot, ndërsa kujtojmë atë ditë, jemi më të bashkuar se kurrë në pritjen e kthimit të heronjve tanë në atdhe. Pas një sage të gjatë, besojmë se ata do të kthehen ashtu siç shkuan – të lirë dhe të pafajshëm! Historia nuk rishkruhet, e vërteta nuk mund të ndryshohet dhe lufta e UÇK-së ishte dhe mbetet e drejtë”, ka shkruar Krasniqi.
