Kryetari i PDK-së, Memli Krasniqi, pas pritjes së diasporës thotë se është i vetëdijshëm për përkrahjen që mërgata kosovare ia ka dhënë Lëvizjes Vetëvendosje në zgjedhjet e fundit, por, sipas tij, kjo po ndryshon.

“Ka ndryshime të mëdha. E para, për shkak të krejt premtimeve të Kurtit, sepse ai paraqitur më shumë në karakterin nacionalist, por edhe në aspektin ekonomik. Ata vijnë edhe e shohin”, tha Krasniqi.

Tutje, ai në emisionin “Frontal” të T7 përmend angazhimin e partive opozitare në vendet ku jetojnë më shumë diaspora kosovare.

Krasniqi thotë se një nga arsyet e zvogëlimit të aktivitetit të PDK-së në diasporë është pasivizimi i degëve të partisë nëpër Evropë, pasi Kosova u bë shtet dhe u hapën ambasadat e konsullatat.

Këtë, sipas Krasniqit, e ka shfrytëzuar Kryeministri Albin Kurti dhe Lëvizja Vetëvendosje, e cila u votua masivisht nga diaspora në zgjedhjet e fundit.

Kryetari i PDK-së thotë se e kanë parë të nevojshme që partia të rikthehet sërish në vendet ku jeton mërgata kosovare.