Kombëtarja e Kosovës në hendboll do të luaj në Grupin A në fazën e parë kualifikuese për Kampionatin Botëror të vitit 2023.

Shorti për fazën e parë të kualifikimeve evropiane për Botërorin e ardhshëm është tërhequr të enjten, njofton FHK-ja, përcjell Demokracia.com.

Në grupin e parë janë Belgjika, Turqia, Greqia e Kosova. Pra është një grup i vështirë, ku Kombëtarja jonë do të kërkojë njërin prej dy vendeve të para për avancim tutje.

Në grupin e dytë janë Finlanda, Estonia, Gjeorgjia dhe Britania e Madhe. Në grupin e tretë janë Rumania, Izraeli, Qipro e Moldavia.

Ndërsa kë grupin e katërt janë Letonia, Italia, Luksemburgu e Ishujt Faroe.

Në fazën e parë kualifikuese paraqiten ekipet kombëtare që nuk janë kualifikuar në Euro 2022. Dy të parët në secilin grup kalojnë në raundin tjetër.

Kosovës i takon e drejta e organizimit të turneut, në bazë të shortit, nëse Kombëtaret e grupit të parë merren vesh që të gjitha ndeshjet të luhen në një vend.

Nëse vendoset që të luhet në sistem vajtje-ardhje, atëherë ndeshjet fillojnë prej javës së parë të nëntorit.

Avancimi në raundin e dytë kualifikues është synim i Kombëtares sonë, pas sukseseve të viteve të fundit.

Në kualifikimet e kaluara për Botëror ishim në vend të dytë, ndërsa ndeshjet ishin luajtur në Itali.

Në kualifikimet e fundit për Evropian kemi shënuar fitore historike ndaj Rumanisë, ndërsa me këtë Kombëtare kishim edhe një barazim.

Po ashtu kemi luajtur dy ndeshje të forta me Malin e Zi. /Demokracia.com