Kryetari i Kuvendit të Kosovës, Glauk Konjufca bashkë me presidenten e vendit, Vjosa Osmani si dhe zyrtarë qeveritarë kanë bërë homazhe pranë përmendores dedikuar personave të zhdukur me dhunë gjatë luftës, me rastin e shënimit të Ditës ndërkombëtare të personave të zhdukur me dhunë gjatë luftës në Kosovë.
Konjufca në një prononcim për media ka thënë se ende ekziston një mungesë e drejtësisë për gjithë popullin e Kosovës.
Ai tha se Serbia është përgjegjëse për të zhdukurit me dhunë në Kosovë.
“Kjo është një dhimbje që nuk përfundon këtu. Një mungesë e drejtësisë për familjarët dhe për gjithë popullin tonë të cilëve Serbia, ua zhduku me dhunë më të dashurëve të tyre. Me vetë faktin që këtyre viteve të fundit në shumë lokacione të Serbisë u gjendën trupat e më të dashurëve tonë si në Peruqac, në Rudnicë, Kizhevak e kjo tregon që harta ku bashkësia ndërkombëtare duhet t’i kërkojë të zhdukurit është Serbia”, ka thënë ai.
Kryeparlamentari u shpreh se në Serbi gjenden kriminelët të cilët i kanë kryer këto krime në luftën e fundit në vend.
Ai tha se presidenti i Serbisë dhe institucionet atje t’i hapin arkivat që të zbardhet e vërteta për mijëra të zhdukur me dhunë.
Edhe Presidentja e vendit, Vjosa Osmani, tha se shteti serb nuk po e zbaton marrëveshjen e arritur në Bruksel për hapje të arkivave.
Mes tjerash, Osmani ka kërkuar që bashkësia ndërkombëtare ta shtojë trysninë ndaj Serbisë që t’i dorëzojë të zhdukurit me dhunë.
“Të zhdukurit me dhunë janë plaga dhe dhimbja më e madhe e vendit tonë. Në fillim të këtij viti u arrit një marrëveshje në Bruksel për t’i hapur Serbia arkivat për të zhdukurit, dhe përkundër kërkesën sonë që të bëhet në fillim të qershorit një kërkesë në drejtim të presidentit Vuçiq, fatkeqësisht Serbia vazhdon ta shkelë marrëveshjen”, u shpreh Osmani.
“I bëj thirrje komunitetit ndërkombëtar dhe miqve aleatë që të mendojnë për prindërit dhe familjarët që ende të zhdukurit i kanë në varrezat e Serbisë. Të mendojnë për nënën që e ka varrin e zbrazët, të mendojnë për fëmijët që ende nuk e dinë ku e kanë babain, që Serbia t’i dorëzojë të pagjeturit”, shtoi tutje presidentja Osmani.