Sport
SC Gjilani dënohet me tri ndeshje pa praninë e shikuesve dhe jashtë stadiumit të qytetit
Demokracia
13:57 | 07 Prill 2022

Share:

Komisioni Disiplinor i Federatës së Futbollit të Kosovës e ka dënuar me tri ndeshje zyrtare pa praninë e shikuesve dhe jashtë stadiumit të qytetit SC Gjilanin, pas incidentit të rëndë ku tifozët e këtyre të fundit sulmuan fizikisht portierin e Ballkanit, Stivi Frashërin, në takimin e javës së 27-të kampionale.

“Kuqebardhët” kanë mundësi të zhvillojnë ndeshjet zyrtare si vendas në stadiumin me bari sintetik që ndodhet në Gjilan, por jo edhe në stadiumin e këtij qyteti, raporton Demokracia.com.

“SC ”Gjilani”. Lëshim në organizimin e ndeshjes Gjilani – Ballkani zhvilluar me 03.04.2022 në stadiumin e qytetit në Gjilan. Në minutën e 90+4, pas barazimit të rezultatit nga ana e vendasve, një numër i shikuesve nga tribuna futen në fushë për të festuar golin e barazimit, dy nga të cilët sulmojnë fizikisht portierin e ekipit mysafir me nr fanelle 77 Stivi Frashëri duke i rrezikuar shëndetin. Lojtarit të sulmuar i është dhënë ndihma e parë në fushën e lojës, pastaj me autoambulacë është transportuar për në spitalin e qytetit”.

“Për shkak të paaftësimit të lojtarit mysafir si rezultat i sulmit nga shikuesit, gjyqtari kryesor duke implementuar rregulloren e garave, në minutën 90 +4 e ka ndërprerë ndeshjen. Sipas raporteve të personave zyrtar të ndeshjes Gjilani – Ballkani . Bazuar 53 paragrafi 1 pika B i Rregullores disiplinore: Dënohet me 3 (tri) ndeshje zyrtare pa praninë e shikuesve si dhe jashtë fushës së stadiumit të qytetit në Gjilan. SC ”Gjilani” ndeshjet mund t’i zhvillojë në terrenin me bari sintetik në Gjilan ose në stadiumet tjera ku klubi dhe shtabi teknik vendosin”, thuhet në njoftimin e lëshuar në uebfaqen e FFK-së.

Komisioni i Garave një ditë më parë e regjistroi ndeshjen e ndërprerë në minutën e 94-të me rezultat zyrtar 0:3 në favor të Ballkanit.

Ndryshe, dy persona të dyshuar për sulmin po mbahen në paraburgim./Demokracia.com/

Të ngjashme