Kështu tha ambasadori kinez në OKB, Zhang Jun, president i radhës i Këshillit, në përfundim të konsultimeve me dyer të mbyllura, së bashku me ambasadoren e Emirateve të Bashkuara Arabe, Lana Zaki Nusseibeh.

Të dy vendet kërkuan takimin “për të shprehur shqetësim të madh për sulmet e vazhdueshme të Izraelit ndaj kampeve të refugjatëve, shkollave, spitaleve, objekteve të OKB-së dhe objekteve të tjera civile në Gaza”.

“Diskutimet vazhdojnë mbi projekt-rezolutën dhe ne vazhdojmë të përpiqemi të reduktojmë dallimet midis anëtarëve të Këshillit”, tha Nusseibeh.

Teksa, luftimet në Gaza, vijojnë prej tashmë një muaji.

Një muaj luftime

Sulmet e 7 tetorit nga militantët e Hamasit, të cilët sulmuan nga Gaza dhe goditën kibucitë dhe zonat jugore izraelite, vranë 1 mijë 400 njerëz, kryesisht civilë.

Imazhet e trupave të djegur dhe të gjymtuar, të krahasuara me tmerrin e Holokaustit, dhe rrëmbimi i më shumë se 240 njerëzve nga personat e armatosur të Hamasit vazhdon të shkaktojë trazira politike dhe emocionale.

Gaza – një territor prej 2.4 milionë banorësh, një nga zonat më të dendura të populluara në Tokë – është shndërruar në një fushë beteje apokaliptike nga sulmet ajrore dhe sulmet tokësore pasi Izraeli u zotua të zhdukë Hamasin.

Ministria e shëndetësisë në Gazën e drejtuar nga Hamasi thotë se rreth 10 mijë janë vrarë, dy të tretat e tyre gra dhe fëmijë, dhe kryesisht civilë.

Al Quds, e përditshmja palestineze më e lexuar, tha se Gaza është bërë një varrezë për mijëra njerëz të pafajshëm.

“Ndjehet sikur duhet të shtrëngojmë veten për t’u siguruar që ky është me të vërtetë realiteti i ri”, shkroi këtë javë e përditshmja izraelite e krahut të majtë “Haaretz”.

“Ndryshimi i shkaktuar nga lufta është total: në humbje jete dhe në dëme, në ankth, në agjendën e vendit dhe në përmbysjen totale të konventave të vjetra politike nga çdo aspekt i mundshëm”.

‘Fuçi baruti’

Frika është rritur për një zjarr të mundshëm rajonal.
Irani, një aleat i Hamasit dhe i Hezbollahut në Liban, ka paralajmëruar se situata rrezikon të dalë “jashtë kontrollit” në një Lindje të Mesme të transformuar në një “fuçi baruti”.

Një zëdhënës i Pentagonit tha se Shtetet e Bashkuara janë “të shqetësuara për të gjithë elementët e rrjetit të kërcënimit të Iranit që rrisin sulmet e tyre në një mënyrë që rrezikon llogaritjen e gabuar, ose futjen e rajonit në luftë”.

Këshilltarët ushtarakë amerikanë janë në Izrael dhe dy grupe ajrore amerikane janë vendosur në Mesdheun lindor.

Ndërsa tensionet rriten, ushtria izraelite është në gatishmëri edhe në kufirin e saj verior me Libanin.

Duke thyer një muaj heshtje të premten, shefi i Hezbollahut, Hassan Nasrallah tha se “të gjitha opsionet” ishin të hapura për një përshkallëzim të konfliktit në kufirin libanez me Izraelin, ndërsa në të njëjtën kohë fajësoi Shtetet e Bashkuara për luftën.

Zëdhënësi i Pentagonit, gjeneral brigade Patrick Ryder tha se nuk mendonte se Hezbollahu do të përshkallëzonte luftimet, duke i thënë BBC-së se “një konflikt më i gjerë rajonal është penguar”.

Megjithatë, Avi Melamed, një specialist izraelit për marrëdhëniet në Lindjen e Mesme paralajmëroi: “Hezbollahu mund t’i vërë zjarrin rajonit”.

“Ata kanë një kapacitet ushtarak dhjetë herë më të lartë se celulat e Hamasit”, tha ai për AFP.

Ushtria izraelite thotë se janë gjithashtu të përgatitura për t’u përballur me çdo përshkallëzim në Bregun Perëndimor, i pushtuar që nga viti 1967 dhe skenë e dhunës më intensive që nga shpërthimi i luftës në Gaza.

‘Radikalizim’

Izraeli dikur u lavdërua për aftësitë e tij ushtarake dhe inteligjente, por ky reputacion u dëmtua në mënyrë drastike nga sulmet e 7 tetorit.

“Unë nuk fle”, tha Sarit Zehavi, një nënë e tre fëmijëve dhe një nënkolonel rezervë që ka frikë se Hezbollahu do të kopjojë Hamasin dhe do të infiltrojë në veri për të “vrarë, masakruar”.

Për banorin e Gazës, Omar Ashur, i cili ishte tetë vjeç në vitin 1948 kur u krijua shteti i Izraelit, “ajo që po ndodh është e rrezikshme”.

Ai ka frikë se dhuna do të provokojë “një Nakba të dytë”, duke iu referuar eksodit masiv të rreth 760 mijë palestinezëve, sipas shifrave të Kombeve të Bashkuara, që pasoi luftën e parë arabo-izraelite në 1948.

Protestat pro-palestineze janë mbajtur në qytete anembanë botës ndërsa numri i civilëve të vdekur në Gaza është rritur. Ka pasur edhe mitingje në solidaritet me Izraelin.

“Thirrjet për një armëpushim janë thirrje për Izraelin që t’i dorëzohet Hamasit”, tha këtë javë kryeministri Benjamin Netanyahu.

Zëdhënësi i Hamasit, Abu Obeida është zotuar se “Gaza do të jetë një varrezë dhe moçal për armikun”.

Për ish-ministrin palestinez Ghassan Khatib, i cili jep mësim në Universitetin Bir Zeit në Bregun Perëndimor, “radikalizimi ka përforcuar secilën anë të konfliktit dhe ka çuar në një mosbesim të thellë në një zgjidhje paqësore”.